(CuraçaoChronicle) – Union Europeo y varios pais miembro, incluyendo Hulanda, Francia y Alemania a pidi pa Venezuela “publica e documentonan di eleccion lo mas pronto posibel.”
E peticion aki ta pa mira si e documentonan por comproba si berdaderamente Nicolas Maduro a keda reeligi como presidente bao su mesun merito. E ta bini tambe despues di reportahe di observadornan cu e eleccion presidencial cu a tuma luga dia 28 di juli no a cumpli cu e standard internacional di integridad electoral.
Den un declaracion uni, e hefenan di estado y gobiernonan di e paisnan Europeo involucra a haci yamado na e autoridadnan Venezolano pa “inmediatamente haci tur protocol y rapport publico pa garantisa e transparencia y integridad di e proceso electoral.” Prome Minister Hulandes Dick Schoof a enfatisa riba e plataforma X, e importancia di “respeta e deseo y derechonan di e pueblo Venezolano” y a condena e violencia y menasanan contra manifestantenan pacifico y miembronan den oposicion.
Josep Borrell, Alto Representante di Union Europeo pa Exterior, a reitera diadomingo anochi cu data oficial di e stacionnan di voto no a ser haci publico ainda, a pesar di compromisonan di e conseho electoral di Venezuela.
Borrell a adverti cu sigui sconde e data aki ta solamente pone mas duda riba e credibilidad di e resultado di eleccion.
Segun e hechonan reuni pa e oposicion Venezolano, Edmundo Gonzalez Urrutia lo a gana cu un mayoria significante.
