Europa preparando pa un Pasco manera nunca antes

Paisnan Europeo ta preparando pa un Pasco manera nunca antes e ultimo generacionnan a conoce. Mayoria pais a impone medidanan pa reduci circulacion di hende na sitionan di hopi riesgo. Cada pais di Union Europeo ta liber pa aplica medida y reglanan cu ta necesario segun su situacion particular. Austria a sera mayoria di hotel, bar café y restaurantnan, ski ta permiti solamente pa esnan cu ta biba den cercania di e areanan di ski. Algun resort di ski por habri y funciona pero cu capacidad limita di bishitante. Horeca lo keda sera te cu 7 di Januari 2021.

Belgica a prohibi tur actividad publico, esnan cu ta biba nan so por ricibi bishita di dos persona, tin “Toque de Queda” di 12:00 mey anochi pa 5 or di mainta. Bulgaria a prohibi tur actividadnan cultural, teatronan por tin ocupacion di 30 %, tur restaurant ya ta cera, ta permiti entrega di cuminda na cas of negoshinan, tur centro comercial y tienda no esencial tambe a cera. Croatia a laga sera tur bar y restaurantnan y a prohibi recepcion di casamento y otro fiestanan social. Dinamarca si ta permiti actividad publico te cu 50 persona, tur bar y restaurant tin cu cera 10 or di anochi. Francia ta permiti bishita na cas durante dianan di fiesta te cu 6 persona adulto, mucha no tin limite. Algun teatro y museo a habri entrante 15 di December na Francia, nan tin un Toque de Queda si di 8 or di anochi pa 6 or di mainta. Alemania a cera tur scol y tienda no esencial te cu 10 di Januari. Bishita di cas ta permiti te cu 10 persona den un cas, 5 miembro di cada famia. Sinembargo Gobierno di Alemania a pidi tur hende pa keda nan cas, no sali haci bishita durante Pasco y Aña Nobo ya cu e situacion a bira hopi critico ultimo dianan. Alcohol ta prohibi y tur evento di vuurwerk a keda cancela na Alemania. Grecia a cera tur scol y tiendanan no esencial, restaurant y bar tambe ta cera te cu 7 di januari 2021, nan tambe tin un “Toque de Queda” di anochi pa mainta. Bookstore y Salonnan di beyesa y barberonan si ta permiti pa keda habri. Italia ta un di e paisnan Europeo cu a impone e medidanan di mas severo, a prohibi biahamento entre regionnan di Italia. For di december 21 pa 6 di januari 2021, hende por move solamente di cas pa trabao of pa un hospital si nan ta den un emergencia. Hulanda manera ta conoci a cera tur tienda no esencial, museo y kapsalon y teatronan te cu januari 19, 2021. Bishita na cas a wordo limita na 3 persona. Muchanan te cu 12 aña ta liber di e limitacion aki, tin hopi mas medidanan cu nan a implementa pa limita riesgo.

Polonia a laga cera tur museo, cinema, teatro, centro comercial. Nan ta permiti servicio di misa cu capacidad di 1 persona pa cada 15 meter cuadra. Horeca ta parcialmente cera, e restaurantnan ta permiti pa solamente bende cuminda pa bin busca of delivery. Nan tin ora special pa ciudadanonan 60 plussers por haci compras; entre 10 or di mainta y 12 or di merdia. Bishita na cas a keda limita na 5 persona.

Spaña a prohibi biahamento di region pa region mescos cu Italia, for di 23 di December te cu 6 di januari, 2021. Bishita familiar tin limitacion di 10 persona. Zweden a limita bishita di cas na 6 persona pa henter e temporada di Pasco te cu Aña nobo. Gran Bretaña a flexibilisa biahamento entre su paisnan entre 23 di december pa 27 di december, a sugeri famianan pa crea un “Christmas Bubble” cual ta encera un grupo di algun famia y amigonan y no habri cas pa tur bishita. Tur hende tin cu bay haci sacrificio y coopera pa asina proteha nan mes, nan famia y salba mas bida posibel durante e periodo di dianan di fiesta di Pasco y Aña nobo. Aki na Aruba nos mester sigui cumpli cu hopi disciplina pa e casonan no sigui subi, sino aki tambe medidanan mas estricto lo tin cu wordo introduci.