FARC ta cuminsa awe 20 di juni cu e etapa final di nan desarme, cu presencia na Colombia di secretario general adhunto di Asunto Politico dNacionnan Uni, Jeffrey Feltman.
E dia ey, sin embargo, ainda nan no ta stop di ta gueriya, pasobra completa e entrega di 100% di tur arma individual na e 26 puntonan unda nan ta agrupa, lo por tuma, segun e hefe guerrillero Carlos Antonio Lozada, como cuatro pa cinco dia.
E acto den cual finalmente FARc lo formalisa su desaparicion como grupo arma lo tuma luga na Mesetas, departamento di Meta, un di e puntonan unda awor ta concentra e ‘Bloque Oriental’, historicamente esun mas numeroso y di mas poder militar di e guerrilla.
Ta previsto cu e historico hecho lo tuma luga dia 27 di juni y cu e ceremonia lo ser encabesa pa presidente Juan Manuel Santos y e hefe maximo di FARC, Rodrigo Londoño, ‘Timochenko’.
Loke a keda pa entrega ta e ultimo 40% di e armamento cu FARC tin den su poder. Henter e proceso a conoce cierto retraso ora cu a tarda mas di loke tabata planea pa entrega e di dos 30% di arma. E procesonan di registracion y entrega tabata tuma mas tempo cu loke tabata programa. Sin embargo e proceso a bay sin mayor incidente.
Parti di e acuerdo di paz ta tambe cu FARC lo ser permiti converti su mes den un partido politico legitimo. Den pasado di igual manera a cera paz na diferente pais na Centro America, unda por ehemplo na Nicaragua Frente Sandinista pa Liberacion Nacional (FSLN) a bira un forsa politico legal, igual e caso na El Salvador unda Frente Farabundo Marti pa Liberacion Nacional (FMLN) a cera acuerdo di paz na 1992.
