Minister di Finanzas y Economia, Xiomara Maduro a tuma nota cu durante e ultimo dianan tabatin hopi discusion tocante otorgamento di boet pa esunnan cu no ta cumpli debidamente cu nan pagamento di belasting. E mandatario a manda un señal cla y raspa pa esunnan cu no kier paga belasting, ya cu e control lo bay bira mas intensivo.
Cu su caracteristico: “Señores”, e mandatario a indica cu boet ta parti di e instrumento pa por crea e contribucion necesario cu mester pa asina cumpli cu e compromisonan cu pais Aruba tin cu atende. “Nos tur sa cu nos tin cu paga belasting, pero tin un grupo di hende tambe cu no kier tende di pagamento di belasting,” el a bisa.
E ta haya cu net e grupo ey cu no kier paga belasting, mester wordo atendi riba nan comportamento pa medio di introduccion di boetnan. “Ta p’esey e boetnan t’ey,” el a bisa.
E mandatario a agrega cu si bo tin un comportamento bon pa locual ta pago di belasting, cu ta un obligacion cu nos tur tin como ciudadano, no tin niun sorto di problema. Pero esunnan cu no ta paga y no ta paga na tempo, nan tin un boet.
Maduro a indica cu nan ta trahando riba e organisacion di departamento di Impuesto den su totalidad. No solamente nan lo haci uzo di instrumento electronico y digital cu lo yuda acelera cierto proceso. Pero tambe den parti di e procesonan interno mes den e departamento menciona lo tin mas organisacion.
E mandatario a bisa cu departamento di Impuesto lo bay haya colaboracion di Fondo Monetario Internacional (IMF), caminda e instancia internacional aki ta bay duna asistencia den e prome kwartaal na nan.
Es decir gobierno lo bay haya proximamente personal di IMF pa bin yuda cu e parti di facilita e proceso di impuesto. Esaki lo permiti cu departamento di Impuesto lo bay haya espacio pa por atende cu e asunto di e cumplimento di pago di belasting. Pero tambe pa bin cu mas control necesario cu mester den esey tambe.
