Reunionnan cu diferente stakeholders ta tumando luga pa loke ta trata e formacion di gabinete nobo di gobierno, ayera atardi sindicatonan como SIMAR, Seppa, Sada, Topa, Sinba, entre otronan a trece nan punto y preocupacionnan dilanti.

Bon di Aruba a tuma contacto cu Sindicato di Maestro di Aruba (SIMAR) y su presidente Josephine Albertus cu a menciona cu e reunion a bay bon cu formado Evelyn Wever-Croes na unda tabatin dos punto di agenda, un di nan tabata pa duna informacion riba e Landspakkete cu a caba di sali y e di dos tabata pa nan duna nan vision riba con nan ta wak e gobernacion di 2021 pa 2025.

Den e prome parti nan a bisa cu nan tabatin preocupacion tambe tocante cu no tin envolvimento di stakeholders, un di nan ta SIMAR como sindicato y nan a trata e parti di eficiencia di e parti di sector publico, e aparato publico “ y eynan tin cosnan cu lo tin cu bay cambia”, Albertus a señala.

El a sigura cu nan ta papiando riba un investigacion riba e prome, segundo y di tres arveidsvoorwaarden, nan a papia riba flexibilisacion di leynan laboral y di capitulo 9 di LMA cu ta e parti di retiro di schorsing na unda cu SIMAR a sigura cu “eseynan ta puntonan cu ta regarda e exposicion huridico di un trahado, anto nos kier sa na ki momento nos lo wordo envolvi”.

El a enfatisa cu nan a tuma nota di algun puntonan cu tin retraso, pa nan tene na cuenta cune, nan a presenta nan preocupacionnan como sindicato pa motibo cu ora miembronan ta puntra riba algo nan tin cu duna un contesta pa esey.

Asina mes, nan a entrega un rapport cu segun Albertus a señala den esey nan a tuma bista di e Landspakkete completo y den dje aparte di e tema di enseñansa tambe tin otro puntonan cu tambe tin influencia riba un trahado den e veld di enseñansa.

“Nos a saca tur di nan, cu nos ta haya cu ta regarda enseñansa, nos a pone pregunta y riba e parti dos con nos ta wak e formacion di gobierno, nos por bisa cu eynan nos a splica cu e gobernacion anterior tabatin un decadencia den e sistema di enseñansa y door cu no tabatin dialogo, no tabatin participacion y envolvimento di e veld, awo a yega e momento pa nos fortifica e fundeshi, pa haci’e mas solido pa asina nos por sigui crece y bay dilanti”, Albertus a comenta.

El a bisa tambe cu nan a pone tres punto ‘top’ den e documento na unda Albertus a declara cu si ta cambia e tres nan ey pa cuminsa cune nan tin un fundeshi solido, ademas, el a sigura cu tin cambionan cu mester bin den e sistema di enseñansa mes riba e posicion huridico di un trahado den enseñansa, tin cambionan den e situacion laboral y tin tambe riba e parti social y cuido “y nos no por cambia tur cos den un dia”, Albertus a sigura.

Ta p’esey cu nan a señala pa cuminsa traha riba e tres puntonan ey y cu e parti di finansa pa nan ta algo hopi importante, pa motibo cu den e Landspakkete tambe por mira cu ta trata di subsidio, enseñansa ta un sector cu ta ricibi subsidio di gobierno pa por draai.

“Nos a ripara tambe cu den gobernacion anterior a corta y a dicidi di aloca fondonan di enseñansa den otro parti, aworaki mirando e decadencia cu tin, e tiki fondo cu tin si ta bay corta eynan atrobe, nos no ta bay dilanti, nos mester ta honesto den esey”, Albertus a enfatisa.

Asina mes, nan por trece algun exigencia manera Albertus a señala pero na final ta gobierno ta dicidi pero nan kier ta sigur cu nan a entrega e puntonan y esey ta conhuntamente cu e veld, “den e tres aña aki como directiva, nos semper ta traha cu e veld y sinta cu otro stakeholders y nos ta zorg pa pone tur cos riba un papel pa ora cu nos pone algo no ta loke SIMAR ta pensa, e ta loke el veld ta pensa”, el a manifesta.

Di loke ta trata formacion di gobierno, el a menciona cu nan a trece nan puntonan dilanti den e proceso di formacion aki y nan ta espera cu ora gobierno forma, esun cu lo sinta y bira minister di enseñansa, cu nan kier sigui dialoga pa motibo cu e meta cu nan tin ta pa mehora e situacion cu Aruba tin y pa nan por haci’e nan tin cu haciel’e hunto y mester ta transparente.