Esun cu bay goberna awor… Ta perde siguiente eleccion…?

Nos ta den un campaña electoral unda tur partido ta mustra e mesun gana y animo pa bay goberna proximamente. Esey no por ta otro pasobra kico bo ta haci den un eleccion si bo no tin interes pa bay goberna? Ta ora bo ta den gobierno bo por logra algo di bo propio programa, aunke hopi ta depende tambe di un eventual coalicion cu bo ta aden cu por limita bo entusiasmo, o bo ta goberna bo so, no asina realistico awor, pero recurso financiero limita di igual manera ta pone un paro na bo ambicionnan. Loke den e situacion actual aki ta parce di ta e caso pa cualkier cu ta bay goberna.

Di e manera aki ta parce logico cu di tur banda nos ta haya nada mas cu formulacion general di cualkier asunto o problema cu prensa trece dilanti, sin bay mucho den detaye con exactamente ta bay atende e asunto. Asina aki nos a keda ‘debidamente informa’ cu tur partido ta bay drecha, por ehemplo enseñanza… Esey ta sigur sumamente elogiable, pero nos no a tende tanto di con ta bay resolve e problemanan grandi riba e tereno aki, y ademas: cu ki placa? Soño no ta costa nada, tanten nan ta keda soño, pero pareu bo cuminza traha riba nan, nada ta sucede pornada. Y aki atrobe nos ta keda den un completo scuridad pasobra no ta duna ningun indicacion kico si ta bay haci y con. Sin embargo, tin un luz na horizonte. Hulanda ta dispuesto di yuda tambe den desaroyo di e sector aki, loke ta parce nos magnifico, basta di banda di Aruba tin colaboracion sano y no sabotahe, pero si teniendo cuenta cu loke a daña den 40 aña, no ta bay drecha den 4.

En todo caso, e tarea aki no ta parce nos esun mas peligroso pa e siguiente gobierno. Loke si ta mustra bastante dificil ta e tarea pa corta 20% di gasto di personal den 5 aña – poni den e Uitvoeringsagenda – cu a base di e actual situacion ta implica perde alrededor di 1.500 cupo di trabao. Esey ta 1.200 cupo den e proximo cuatro aña, 300 cada aña, loke ta parce un tarea realizable, pero den un situacion economico cu ta permiti esey. Aki caba nos ta bay hopi mas leu cu lo bo tende di mayoria di e partidonan. Nos por comprende esey, pero nos no por keda pega den observacion general y mester trece dilanti loke ta warda nos mañan, pasobra loke ta bin no ta pa e politico y pa gobierno, sino pa nos tur. Asina nos por imagina nos mes cu mester bay papia den mas detaye tambe riba e cambionan na caminda caba den nos sistema fiscal. Aki ta unda cada partido riba nan mes mester dicidi kico pa haci: keda keto y no duna claridad, y conta riba e sosten di e votador tradicional cu no ta apoya pa programa sino pa lealtad. O duna mas en detaye kico lo bay haci, y core e riesgo di mensahe cu hende no lo gusta. Di tur manera, nos tin caba e realidad cu a dicidi un cambio grandi den e sistema fiscal, di cual esun central ta e cambio di e impuesto indirecto (BBO/BAZV/BAVP) pa algo nobo, cu ta bay ta un BTW di 12,5%, cu un ABB estilo Bonaire como un alternativa remoto. Nos ta na menos di un luna di eleccion y cu algun excepcion faborable ta parce cu e mayoria no kier toca e tema aki. Ta mustra straño pa ta papia di mehora economia, mehora condicion den cual empresa mester opera, pero no ta papia di con ta bay atende e asunto aki. Ta di spera cu den e debatenan cu ta bay tin, lo confronta e partidonan cu pregunta concreto den e sentido aki.

Despues di e escogencia entre disposicion pa mustra detaye o keda hermetico cu termino general manera ‘nos lo bay drecha…tal cos’, ta bin e problema mas grandi ainda, y esey ta pa por conta cu e hendenan pa por ataca e problemanan grandi cu Aruba ta enfrentando. Aruba no ta carece di experticio riba varios tereno, pero hopi di nan no ta desea traha den un ambiente politiza, pasobra hopi kier tin un ‘bida despues di politica’ y esey no ta asina facil. Toch esaki ta hopi importante pasobra den e implementacion hunto cu Hulanda di e trabao grandi di reforma gobernacion no ta suficiente di por conta cu e ‘hofhouding’ alrededor di e ministronan cu a bira e tradicion den ultimo decadanan, unda ta dificil pa topa cu algun berdadero consehero di nivel cu nos mester den e obra mas grandi aki cu a yega di tuma lugar den gobernacion di Aruba.

E partidonan, antiguo o nobo, cu ta kere cu e cultura di rondona bo mes cu hende cu no sa tanto pero ta haci exactamente loke bo bisa nan, lo ta suficiente pa enfrenta e retonan den e proximo periodo di gobernacion, no lo ta prepara pa loke ta warda nan. Nan lo perde e siguiente eleccion pasobra nan no por a cumpli. Di otro banda, hopi hende por keda rabia pa e medidanan cu lo tuma, y bo lo por perde eleccion siguiente cumpliendo cu bo trabao. Cual ta scoge?