Recientemente, Dr. Robin DiPietro di Universidad di South Carolina, Sr. John Wardlaw y Sra. Jo-Anne Croes di Universidad di Aruba a publica resultado di nan estudio di pensioen pa Aruba. Fin di augustus y september ultimo, e investigadornan a haci dos entrevista profundo cu empleadonan di sector priva y publico. Resultado di esaki ta revela preocupacion significante y diferente nivel di sosten y sugerencia pa mehoracion.

Mayoria di e encuestadonan a percibi e pago di pensioen tanto pa matrimonio (averahe: Afl. 1,993.29) y soltero (averahe: Afl. 1,401.41) como insuficiente, cu mayoria pensando cu e pensioen no ta adecua pa cubri costo basico di bida. Interesantemente, e percepcionnan di encuestadonan tocante kico e suma actual di pensioen ta, tabata incorecto, mustrando asina un falta di conocemento den pueblo di Aruba tocante cuanto florin ta paga actualmente pa pensioen.

Autornan di e estudio a splica den nan resumen cu aproximadamente 82 porciento di encuestado a expresa di no ta satisfecho cu e sistema di pensioen actual, mientras apenas 18 porciento si tabata satisfecho. Notablemente, 92 porciento no tabata di acuerdo cu e plan di pensioen ta provee seguridad financiero adecua, y 77 porciento a mira adultonan mayor enfrentando dificultadnan financiero. Adicionalmente, un consenso fuerte a bin dilanti den sosten di aumento di pensioen, cu 75 porciento di encuestado bogando pa pago mas halto, y 93 porciento di acuerdo cu mester indexeer pensioen na e costo di bida.

Retonan manera aumento di costo di bida, awa cu coriente, y gastonan medico a ser mira como pesonan financiero principal pa adultonan mayor. E encuestadonan abrumantemente a sostene solucionnan alternativo, manera reduccion di impuesto pa adulto mayor (83 porciento) y a enfatisa e importancia di sigura un retiro financiermente solido pa e adultonan mayor, cu 83 porciento di encuestado considerando esaki un prioridad halto of esencial.

Sector priva
 E preocupacionnan principal pa e sector aki tabata e necesidad pa sigui traha despues di a yega edad di pensioen; e peso di impuesto na momento cu ainda ta trahando mientras tambe ta cobra pensioen; e sugerencia pa elimina of al menos reduci impuesto riba entrada surpasando y riba pensioen; y pa elimina pensioen como un entrada y procesa impuesto riba entrada “adicional” gana ademas di pensioen ricibi, manteniendo e mesun limite liber di impuesto pa e entrada aki.

Sector publico (sector di Salud)

E preocupacionnan principal pa e sector aki tabata e estado di cuido di salud pa adultonan mayor, sea remedi receta, tempo di cita medico, cuido full-time sea na cas of pasadia of cas di cuido; e impacto financiero di tin un mayor den un cas di cuido; e impacto – financiero, social of emocional) riba famianan cu tin retonan di salud degenerativo a plaso largo, manera cancer, Parkinson’s y retonan di salud mental manera Alzheimer’s; y stimula accionnan preventivo pa mehora salud mental y fisico.

Grupo di enfoke

Despues di e entrevistanan, e investigadornan a realisa un grupo di enfoke a profundidad pa determina mas di e problemanan relaciona cu pensioen na Aruba. E grupo di participante aki tabata consisti di 8 residente di Aruba, incluyendo: Combinacion di Pensionado/No-Pensionado, Edad 40-70, Homber/Muhe, Soltero/Casa/Divorcia. E grupo a consisti di trahadornan di Sector Priva (banco y entrepreneur), y Sector Publico (educador y trahador di gobierno).

E preocupacion y comentarionan principal pa e discusion di e sector aki tabata similar na e datonan di entrevista, pero mas vocal riba necesidadnan specifico; insistente cu pensioen no ta suficiente; necesidad pa al menos duplica pensioen, y unabes aumenta, mester ta automaticamente indexa na aumento di costo di bida; pa reconoce y respeta esnan cu a paga impuesto henter nan bida; pa permiti esnan den edad di pensioen pa complementa nan entrada, sin mester paga mas impuesto riba e entrada ey; pa tin un esfuerso coordina pa tin un Carchi di Descuento pa Adulto Mayor funcional, unda gobierno ta facilita descuento, specialmente den Utilities. Un partnership entre sector publico y priva, unda gobierno ta curasha sector priva pa sostene e Descuento pa Adultonan Mayor.

Encuesta

Despues di colecta data cualitativo, a desaroya un encuesta comienso di september, y facultad y studiante di Universidad di Aruba a colecta data di encuesta durante fin di september y october 2024 a traves di comparti un link di encuesta traha riba Survey Monkey riba WhatsApp y Facebook pa haya residentenan Arubiano cu tabata den e poblacion di e estudio aki. E gruponan di Facebook cu a usa tabata Vraag en Aanbod y despues a haci “snowball sampling” a traves di contactonan di Universidad di Aruba. Tambe a comparti e link di encuesta cu un noticiero online pa captura un muestra mas diverso.

Tabatin un total di 695 encuesta completa cu 123 na Ingles y 572 na Papiamento. Algun di e preguntanan no a ricibi contesta, pues no tur aspecto di e encuesta ta suma e total di 695 encuestado.

Edad averahe di encuestadonan tabata 47.4 aña. A pone nan den 7 diferente grupo di edad, y e grupo mas grandi tabata 18-30 aña, sigui di cerca pa 61-70 aña.

Di encuestadonan, 387 tabata muhe y 299 tabata homber, y dos persona a selecta “otro.”

Mayoria di encuestado ta traha den sector priva (249 of 37 porciento), pero mas cu 177 (25 porciento) a contesta “otro”, cu tabata sea desemplea, studiante, of tabatin ‘otro’ empleo. Mayoria di encuestado tabata traha full-time (374 of 54 porciento). E categoria di ‘otro’ tabata principalmente studiante of pensionado of trahando part-time, pero no a selecta e categorianan mas trempan den e respuesta ey.

Encuestadonan a representa tur districto mayor di Aruba, cu mayoria bibando na Noord y Oranjestad, pero e otro districtonan tambe tabatin bon representacion. Mayoria di encuestado a gradua di scol secundario (Mavo, Havo, VWO) como nan nivel mas halto di educacion completa (263 of 38 porciento), pero otro gran porcentahe a gradua di universidad (Bachelor’s – 152 of 22 porciento). Mayoria di encuestado tabata casa (285 of 41 porciento) of soltero (202 of 29%), pero encuestadonan a nota un variedad di status relacional, manera divorcia, separa, of cohabitando.

Conclusion
 E resultadonan di e investigacion claramente ta indica cu e encuestadonan, sin importa status, firmemente ta di acuerdo cu e pensioen no ta suficiente pa provee adultonan mayor cu un entrada pa por biba.

Hallazgonan di e estudio aki ta subraya e necesidad urgente pa reforma di pensioen y sosten financiero adicional pa adultonan mayor na Aruba.