Den luna di juni ultimo Comision di Parlamento di Asuntonan Social a ricibi presentacion di e estudio realisa pa Sra. Clementia Eugene den cual a revela cifranan alarmante di abuso di mucha. E estudio aki ta trece dilanti diferente punto di importancia y ta detaya abuso di mucha pa categoria, edad y diferente factor.

Den su estudio Sra. Eugene ta remarca cu maltrato di mucha ta inclui cualkier forma di abuso cu ta violento of menasante pa un mucha bou di 18 aña di edad y cu ta causa daño. E abuso por wordo cometi door di un persona cu autoridad, manera un mayor, un persona cu tin custodia, un entrenador, lider religioso of pa un otro mucha tambe.

Tin diferente forma di abuso di mucha: abuso fisico, emocional, negligencia, abuso sexual of mucha cu ta testigo di violencia entre mayornan. Abuso di mucha ta viola e derechonan di mucha y evidencia ta sostene cu e efecto- y consecuencianan emocional y di comportacion ta keda persisti te ora e mucha bira adulto.

E estudio ta resalta cu maltrato di mucha den tur forma ta un violacion di e derechonan humano manera ta hancra den e Tratado di e Derechonan di Mucha (TDM) y ta haci referencia na e articulo 19 cu ta bisa: “Gobierno mester haci tur loke nan por pa sigura cu muchanan ta proteha di tur forma di abuso, fisico, emocional, accidente of abuso, negligencia, explotacion, abuso sexual door di nan mayornan of cualkier persona cu ta cuida nan.

E estudio a consisti di un encuesta digital cu e muchanan mes a yena tocante maltrato di mucha y capacidad humano di mucha den cual 895 mucha di entre 12 y17 aña a participa. E edad medio tabata 14.5. E muchanan a wordo selecta arbitrariamente di 11 scol secundario y 73 klas. E muchanan tabata di ‘ciclo basico’ y klas 1 te 4 di scolnan secundario publico y klasnan 7 te 12 den scolnan secundario priva. E muchanan a representa tur 8 districto di Aruba.

Di e muchanan cu a participa den e encuesta 43.4% (388) tabata mucha homber y 55.3% (495) y 1.3% (12) no a bisa nan sexo. Di e total di participante 77.4% indica cu nan a nace na Aruba, 5.1% a bisa nan ta bin di Hulanda, 4.4% di Colombia y 13.1% ta di 28 otro pais.

Mayoria di e muchanan, 48.0%, a indica cu nan tabata biba cu ambos mayor, 36.0% a bisa nan ta biba cu un mama soltero y e restante 16.0% a bisa nan ta biba cu famia exterior.

E resultadonan di e estudio di Sra. Eugene a mustra un prevalencia di abuso di mucha durante su bida di 78.4% (702) y un prevalencia anual di 50.2% (449). Di e cifranan aki mas mucha muhe cu mucha homber a indica cu nan experiencia abuso den henter nan bida, como tambe den e ultimo aña.

E resultadonan a revela tambe cu tanto mucha homber como mucha muhe ta experiencia abuso di varios tipo. Sinembargo, un poco mas di mucha homber a revela cu nan a experiencia abuso sexual paden y pafo di e famia compara cu mucha muhe den e ultimo aña.

Pa loke ta e tipo di abuso, Sra. Euegene a detaya cual te e tiponan di abuso mas frecuente. Segun e resultadonan di e estudio, abuso fisico ta e tipo di abuso mas prevalente durante bida di muchanan cu 80.0%, sigui pa abuso emocional cu 62.2% y negligencia tabata esun menos prevalente cu 17.4%.

Abuso sexual a wordo parti den dos subtipo: 1. abuso sexual den famia y 2. abuso sexual pafo di famia. Den e categoria aki resultado a mustra cu abuso sexual den famia ta e tipo di abuso menos prevalente, cu 8.9%.

Pa loke ta e prevalencia anual, e estudio ta detaya cu abuso fisico ta e tipo di abuso mas prevalente cu 45.0% sigui pa abuso emocional cu 41.9% y abuso sexual tabata esun menos prevalente cu 8.9%.. Negligencia pa aña no a ser midi.

E estudio aki ta revela tambe cu mayoria mucha, 38.2% a experiencia por lo menos dos tipo di abuso durante nan bida, 31.2% a experiencia por lo menos tres y solamente 10.9% di e muchanan a experiencia un tipo di abuso durante nan bida.

E resultadonan ta demostra cu na medida cu muchanan ta bira mas bieu, e ta bira mas probabel pa nan experiencia: abuso emocional, abuso fisico severo, abuso sexual paden y pafo di famia y bira testigo di violencia entre mayornan. Sinembargo, estudio ta indica, e muchanan tin menos probabilidad di experiencia abuso fisico segun cu nan ta bira mas bieu.

Pa loke ta e factornan socio-demografico cu por pronostica abuso di mucha, segun e estudio ta señala, edad, sexo y percepcion di e mucha di e status socioeconomico tabata e factornan cu ta pronostica abuso di mucha mas comun door cu nan tabata asocia cu dos tipo di abuso.

Edad: mas bieu e mucha ta, mas probable e ta pa ta na riesgo di ta testigo di violencia entre mayornan y pa wordo abusa sexualmente pafo di e famia.

Sexo: ta mas probabel pa mucha muhe ta testigo di violencia entre mayornan compara cu mucha homber. Mientras cu ta mas probabel pa mucha homber ta na riesgo di experiencia abuso sexual pafo di famia compara cu mucha muher. Mas abou e percepcion di e mucha.

Status socioeconomico: ta mas probabel pa un mucha experiencia negligencia y ta testigo di violencia entre mayornan. E estudio a indica cu e nivel di educacion di e mayornan y e status di empleo di tata, tambe tabata indicador di abuso di mucha.

E estudio pa señala cu muchanan cu ta biba cu nan mama cu su nivel di educacion mas halto tabata MAVO, tabatin mas probabilidad di ta testigo di violencia entre mayornan, mientras cu di otro banda ta menos probabel cu muchanan, cu ta biba den hogarnan cu e tata cu su nivel di educacion di mas halto ta un HBO, ta testigo di violencia entre mayornan.

E estudio ta agrega cu muchanan, cu ta biba cu tata cu ta traha, ta na riesgo mas halto pa wordo abusa sexualmente pafo di famia.

Sra. Eugene ta indica cu un gran cantidad di literatura den e region di Caribe a describi abuso fisico y emocional como un comportacion normalisa confirma pa mayornan, educadornan y e propio muchanan. Esaki, el a remarca, por ta e motibo tras di e falta di e factornan di pronostico y ta rekeri mas investigacion den e contexto di Aruba.