Doñonan di cacho experenciando rachanan largo di stress por transferi esaki na nan cacho, cientificonan ta reporta den un estudio publica diahuebs den Scientific Reports.
E investigadonan Sueco a enfoca riba 58 persona kende ta doño di border collies of Shetland sheepdog. Nan a examina cabey for di e persona y nan cacho, mirando e concentracion di un hormona yama cortisol, un kimico cu ta wordo libera den sanger y absorba den foliculo capilar como reaccion na stress.
Depresion, exceso di ehercicio, y desempleo ta algun ehempel di stress cu por influencia e cantidad di cortisol haya den cabey, segun Lina Roth di Linkoping University na Suecia.
Roth y su team a haya cu e patronchi di nivel di cortisol den e cabey di e humano tabata igual cu esun haya den nan cacho, tanto den lunanan di berano como winter, indicando cu nan nivel di stress ta sincronisa.
Roth ta kere cu e doñonan ta influenciando e cachonan, na luga di lo contrario, pasobra hopi rasgo di personalidad humano ta afecta nivelnan di cortisol canino. E investigadonan no sa kico ta causa e sincronisacion di nivel di cortisol entre e hende y nan cacho. Pero un pista por ta e hecho cu e vinculo ta mas fuerte cu cachonan competitivo compara cu mascota.
E bond forma entre doño y cacho di competencia durante training por hisa e dependencia emocional di e cacho riba nan doño, Roth a bisa. Esey por hisa e nivel di sincronisacion.
Pero pakico hende ta influencia nan cacho y no vice versa? Por ta pasobra hende ta ‘un parti mas central den bida di un cacho, mientras humano tin otro rednan social”, Roth a bisa den un email.
E resultado di e estudio no ta sorprendente, segun Alicia Buttner, director di comportacion animal cu Nebraska Humane Society na Omaha. “Evidencia nobo ta biniendo afo continuamente, mustrando cu hende y nan cacho tin lasonan increiblemente cercano, cu ta similar na esunnan cu mayornan tin cu nan yiu”, el a bisa den un email.
Pero el a bisa cu no tin suficiente evidencia pa asumi cu e influencia ta bay un caminda so; e por bay tur dos banda. “No ta asina simpel manera, e doño ta haya stress, e cacho ta haya stress”, el a bisa. Agregando cu hopi otro factor por afecta e nivel di stress di un persona of cacho.
Buttner a bisa cu nivel di cortisol no necesariamente ta indica stress ‘malo’. Nan ta indica un experiencia bon tambe, manera prepara pa sali cana, el a bisa.
Roth y su team tin plan pa investiga si otro rasa di cacho lo reacciona mescos. Mientras tanto, el a ofrece conseho pa minimalisa cuanto stress hende ta causa nan mascota. Cachonan cu ta hunga ta mustra menos señal di stress, el a bisa. Pues, ‘djis ta cu bo cacho y diberti”, Roth a bisa.
