(AFP) – Nos prome añanan di bida ta un tempo di siñamento lihe, sinembargo tipicamente nos no ta corda experiencianan specifico for di e periodo aki – un fenomeno conoci como amnesia infantil.
Un estudio nobo publica den Science, ta desafia e ponencianan tocante memoria infantil, demostrando cu e mentenan hoben aki berdaderamente ta forma recuerdonan. E pregunta ta keda, sinembargo, dicon e recuerdonan aki ta bira dificil pa recorda mas adelante den bida.
“Semper mi tabata fascina pa e punto blanco misterioso aki cu nos tin den nos historia personal,” Nick Turk-Browne, profesor di psicologia na Yale y e estudio su autor, a conta AFP.
Na e edad di mas o menos 1 aña, muchanan ta bira studiantenan extraordinario – adkiriendo idioma, con pa cana, reconoce obheto, compronde lasonan social y mas. “Sinembargo nos no ta corda ningun di e experiencianan aki – pues tin un buraco den e habilidad pa siña aki cu nos tin,” el a declara.
Sigmund Freud, e fundador di psicoanalisis, a trece dilanti un hipotesis cu e recuerdonan aki ta wanta, aunke ciencia for di hopi tempo a en gran parte descarta e idea di supresion activo. Na luga di esaki, teorianan moderno ta enfoca riba hippocampus, un parti di e cerebro cu ta critico pa recuerdo, cual no ta completamente desaroya den infancia.
Turk-Browne, sinembargo, a bira curioso cu pistanan di investigacion di comportamento anterior. Pa motibo cu babynan no por verbalmente reporta e recuerdonan prome cu nan adkiri e habilidad di papia, nan habito di keda wak cosnan familiar pa hopi tempo ta duna pistanan importante.
Estudionan recien cu ta monitor actividad den cerebro di bestia tambe a mira cu e asina yama ‘engram’ – cual ta patronchi di celnan cu ta warda recuerdonan – ta forma den e hippocampus di baby pero ta bira inaccesibel durante tempo – aunke por parcialmente reactiva esaki usando un tecnica cu ta usa luz pa stimula e neuronanan.
Te cu awo, combina observacion di babynan cu scan di cerebro ta fuera di alcance, a motibo cu baby ta conoci pa no coopera ora ta trata para keto den un mashin di fMRI – e dispositivo cu ta rastrae e fluho di sanger pa “wak” actividad di cerebro.
Pa por contra e desafio aki, Turk-Browne su ekipo a usa metodonan cu su laboratorio a refina durante e añanan – trahando cu famianan pa incorpora diferente cos di e mucha manera su klechi, su weganan, y usa background psicodelico pa mantene nan distrai. Sinembargo, movecion inevitabel a causa cu e imagennan no tabata mucho cla y mester a descarta esaki, pero e team tabatin esaki na cuenta y a organisa centenares di sesion.
En total, 26 baby a participa – mita tabatin menos di 1 aña, mita tabatin mas – mientras cu nan a scan nan cerebro durante un tarea di memoria adapta pa estudionan adulto.
Prome, nan ta mira imagen di cara, escena of obhetonan. Despues, ora cu nan a mira otro imagennan, nan ta mira un imagen cu nan a mira caba banda di un otro. “Nos ta calcula con hopi tempo nan ta pasa ta mira loke nan a wak prome, y esaki ta un medida di nan recuerdo pa e imagen aki,” Turke-Browne a splica.
Pa medio di compara actividad durante formacion di recuerdo exitoso versus imagennan lubida, e investigadornan a confirma cu e hippocampus ta activo den crea recuerdonan for di un edad chikito.
“Loke nos por a conclui cu e estudio aki ta cu babynan tin e capacidad di crea recuerdo den e hippocampus cuminsando cu 1 aña di edad,” Turke-Browne a declara.
