(Neurosciencenews)—Hende cu ta bebe ocho of mas bebida alcoholico pa siman tin mas riesgo di haya lesion celebral yama hyaline arteriolosclerosis, señalnan di herida celebral cu ta asocia cu memoria y problemanan cu pensamento, segun un estudio publica di 9 di april 2025, online den Neurology.

E estudio no ta prueba cu bebemento pisa ta causa herida celebral; e ta mustra solamente un asociacion. Hyaline arteriolosclerosis ta un condicion cu ta causa e adernan chikito pa bira mas smal, birando diki y stijf. Esaki ta hacie mas dificil pa sanger core, cual por causa daño na e celebro durante tempo. E ta aparece como lesionnan, areanan di tehido afecta den e celebro.

“Consumo excesivo di alcohol ta un preocupacion grandi den salud global conecta cu un aumento den problemanan di salud y morto,” segun autor Alberto Fernando Oliveira Justo, PhD, di University of Sao Paulo Medical School na Brazil.

“Nos a mira con alcohol ta afecta e celebro mientras hende ta bira mas bieu. Nos investigacion ta mustra cu consumo excesivo di alcohol ta dañino pa e celebro, cual por resulta den problemanan di memoria y pensamento.”

E estudio a inclui 1.178 participante cu un edad promedio di 75 ora nan a muri. Tur a haya autopsia di celebro. Investigadornan a examina tehido di celebro pa busca señalnan di herida celebral incluyendo ‘tau tangles’ y hyaline arteriolosclerosis. Tambe nan a midi e peso di celebro y haltura di tur participante.

Miembronan di famia a contesta preguntanan tocante e habitonan di e participantenan pa loke ta consumo di alcohol.

Despues investigadornan a dividi e participantenan den cuatro grupo: 965 cu nunca tabata bebe, 319 bebedo modera cu tabata consumi siete of menos bebida pa siman; 129 bebedonan pisa cu tabata bebe ocho of mas bebida pa siman; y 368 ex-bebedo pisa.

Investigadornan a defini un bebida di tin 14 gram di alcohol, cual ta aproximadamente 350 ml di cerbes, 150 ml di biña of spiritnan destila.

Di esnan cu nunca tabata bebe, 40% tabatin lesionnan vascular den celebro. Di e bebedonan modera, 45% tabatin lesionnan vascular. Di bebedonan pisa, 44% tabatin lesionnan vascular. Di e ex-bebedonan pisa, 50% tabatin lesionnan vascular.

Despues di ahusta pa factornan cu por afecta salud celebral manera edad na momento di morto, humamento y actividad fisico, bebedonan pisa tabatin 133% mas riesgo di tin lesion vascular den celebro compara cu esnan cu nunca a bebe, ex-bebedonan pisa tabatin 89% mas riesgo y bebedonan modera 60%.

 

Investigacion tambe a descubri cu bebedonan pisa y ex-bebedonan pisa tabatin mas riesgo di desaroya tau tangles, un biomarca asocia cu malesa di Alzheimer, cu 41% y 31% mas riesgo, respectivamente.

Ex-bebedonan pisa tabata asocia cu grado mas abao den masa celebral, un proporcion mas abao di masa celebral compara cu masa corporal, y habilidadnan cognitivo mas malo. No a descubri ningun conexion entre bebedonan pisa y modera y grado di masa celebral of habilidad cognitivo.

Justo a nota cu, ademas di heridanan den celebro, a observa habilidadnan cognitivo afecta solamente den ex-bebedonan. Investigadornan tambe a descubri cu bebedonan pisa a muri en averahe 13 aña mas trempan cu esnan cu nunca a bebe.

“Nos a descubri cu bebemento ta directamente conecta cu señalnan di lesion den celebro, y esaki por causa efectonan den plaso largo riba salud celebral, cual por afecta memoria y habilidad di pensamento,” Justo a bisa.

“Pa compronde e efectonan aki ta crucial pa conscientisacion di salud publico y pa sigui implementa medidanan preventivo pa reduci bebemento pisa.” un limitacion di e estudio tabata cu e no a observa participantenan prome cu morto y no tabatin informacion riba e duracion di consumo di alcohol y habilidadnan cognitivo.

Potretnan ilustrativo.