Un estudio haci na dos hospital di Massachusetts, na Merca, ta indica cu mucha por ta e “transmisor scondi” di e coronavirus nobo y cu nan lo por eherce un papel mayor cu loke a pensa te awor den propagacion di e virus.

E revista cientifico Journal of Pediatrics a publica e siman aki e informe di The Harvard Gazette cu a wordo elabora pa dokter y cientificonan di e universidad Mericano aki.

“Den e estudio mas completo te na e fecha aki, di pacient infantil cu Covid-19,investigadornan ta proporciona datonan critico unda nan ta mustra cu e muchanan ta hunga un rol hopi importante den e propagacion comunitario di Covid-19, contrario na loke a pensa lunanan atras.”

Tambe a trece dilanti cu e nivel di carga viral den e muchanan ta mas halto cu esun cu ta presente den pacientnan malo y cu ta den un estado delicado, hopi di nan hospitalisa na unidad di cuido intensivo (ICU).

“Mi a keda sorprendi cu e nivelnan halto di e virus cu nos a haya den muchanan di tur edad, specialmente den prome dos dia di e infeccion,” Lael Yonker, director di hospital General di Massachusetts y autor principal di e estudio, a bisa.

Tambe el a indica cu “un persona ta pensa cu den hospital tin tur precaucion pa trata adultonan cu ta grave, pero e carga viral di e pacient hospitalisa aki ta hopi mas abao cu esun di un mucha ‘sano’ cu ta core rond tur caminda cu e virus Covid”.

E riesgo di contagio ta mayor ora e presencia di e virus ta mas eleva, mas ainda ora e muchanan ta mustra sintomanan tipico di Covid, manera keintura, verkoud y tosamento, cu normalmente ta coincidi mas cu malesa infantil comun manera griep.

E resultado y conclusionnan haya di e investigacionnan aki tin un implicacion pa loke ta concerni reapertura di scol, centro di cuido di mucha y otro lugarnan unda tin un interaccion di cerca cu maestro y personal di scol.

“Na nivel individual famianan ta preocupa con e infeccion Covid-19 lo por afecta nan yiu y familiarnan, specialmente e famianan cu un status economico abao na unda e infeccion ta hopi mas presente y unda e convivencia di diferente generacion ta e norma; esey ta aumenta e riesgo di transmiti e virus pa welonan vulnerabel y otro adultonan mayor.

E estudio a haya cu 51% di e muchanan cu infeccion grave ta bin for di comunidadnan mas vulnerabel cu tin un salario abao, compara cu 2% di e comunidad cu salario mas halto.

Otro autor di e investigacion, Alessio Fasano, director di Centro di Investigacion di Inmunologia y Biologia di Mucosa di Massachusetts General Hospital, a determina cu “muchanan no ta inmune pa e infeccion aki y su sintomanan no ta co-relaciona cu exposicion y infeccion. Durante e pandemia aki principalmente nos a examina e suhetonan asintomatico, pa cual nos a yega na un conclusion robez cu e mayoria grandi di personanan infecta ta adulto. Sinembargo, nos resultadonan ta mustra cu muchanan no ta protegi contra e virus aki. Nos no mester descarta e muchanan como transmisor posibel di e virus”.

E informe di e estudio a finalisa proporcionando datonan hopi necesario pa autoridadnan lo por adopta mihor condicionnan pa loke ta referi scol, centro di cuido y otro institucion cu ta atende mucha. Fasano a adverti cu “e muchanan mas chikito ta un posibel fuente di plamamento di e virus y mester tuma esaki na cuenta den fase di reapertura di scol”.

Na Aruba, reapertura di scol a keda posponi te proximo 3 di september segun a bira conoci den e dianan aki. Tambe a informa comunidad traves di minister di Enseñansa Armando Lampe cu e proximo paso ideal pa sigui cu lesnan di scol ta pa haci esey via online, mirando e situacion di aumento di caso di Covid-19, pero e crisis team -grupo cu tin autoridad den tempo di crisis y calamidad- a dicidi di pospone apertura di scol pa dos siman mas.

Un decision cu mester tuma a base di salud y seguridad di mucha y docente, como tambe di henter comunidad di Aruba cu, manera e articulo aki a expone den su prome parti, muchanan ta hunga un papel importante den propagacion di e virus, mas ainda cu loke por a pensa algun luna atras.