Estudio: PTSD por ser cura pa tratamento cu “ecstasy”

(NewYorkPost)—Kisas pronto ecstasy por ser un tratamento medico. E droga aki ta conoci como e droga uza mas frecuente den e cultura nocturno, esta MDMA of “molly”. Esaki pronto por ser aproba pa tratamento di “post traumatic stress disorder” (PTSD).

Un estudio nobo, cual a ser publica diamars den Nature Medicine, a descubri cu MDMA hunto cu psicoterapia por trata PTSD asina bon cu hende no ta sufri di sintomanan mas. “Esaki ta un estudio importante,” segun Matthias, Liechti, un psicofarmacologo na e Universidad di Basel na Suiza, a bisa den un comunicado di prensa. “esaki ta confirma cu MDMA en berdad ta traha.”

E Administracion di Droga y Cuminda (FDA) usualmente ta exigi dos prueba prome cu nan aproba un droga pa uzo—y e estudio aki ta e segunda pa haya MDMA safe y efectivo pa trata PTSD. E stimulante—actualmente un droga “Schedule 1” cu un “posibilidad halto pa abuso” y cu no ta acepta pa uzo medico, segun e Agencia di Implementacion di Droga (DEA)—por ser aproba pa FDA pa trata PTSD lo mas pronto posibel.

Sinembargo, Australia a yega eynan caba: Na juli, e pais a bira e prome pais pa permiti e uzo di MDMA pa trata PTSD tambe como depresion. Cada un di e 104 pashent den e estudio recien a traha cu dos team di terapista a haya tres sesion di terapia di 90 minuut sigui pa tres sesion di tratamento cu MDMA (of placebo) separa un luna apart.

E resultadonan a mustra cu mas cu 85% di hende den e grupo di MDMA tabatin un reduccion grandi den sintomanan di PTSD, y aproximadamente 71% a mehora asina hopi cu nan no ta cumpli cu e criteria pa un diagnosis di PTSD mas. Pero pa loke ta trata esnan cu a tuma un placebo, solamente 48% no a cualifica mas pa un diagnosis di PTSD.

Loke ta importante ta cu un porcentahe significante di e participantenan den e estudio tabata Hispano, Latino of no blanco, segun autor Dr. Jennifer Mitchell, un neurocientifico na e Universidad di California San Francisco.

“Nos a traha largo y duro pa por tin un estudio di poblacion cu ta mas den cuadra cu e poblacion general cu PTSD,” Mitchell a conta The New York Times. “Esaki no ta solamente hendenan cu privilegio cu hopi tempo y recurso.”

PTSD ta un malesa psikiatrico cu ta sosode despues di un evento of set di circunstancia traumatico, segun e Asociacion Psikiatrico Mericano, manera desasternan di naturalesa, accidentenan serio, actonan di terorista, guera, abuso sexual, violencia of tentamento severo. E malesa ta afecta te cu 5% adulto Mericano tur aña, y ta famosamente dificil pa trata. Terapianan convencional y medicamentonan ta yuda solamente mita di pashentnan.

Un reto consistente cu pruebanan psicodelico ta e naturalesa di e droga mes: hende usualmente por ripara dentro di par minuut si nan a haya un droga psicodelico of un placebo inactivo, cual por stroba e resultadonan di e estudio.

Asina mes, e posibilidad di un tratamento safe y efectivo pa PTSD ta un logro grandi: “Terapianan asisti cu MDMA por ser e prome tratamento interesta pa PTSD den mas cu dos decada,” segun Dr. Berra Yazar-Klosinski, autor senior di e estudio, a conta The New York Times.