(NLTimes)—Programanan di intercambio den exterior tin un efecto positivo y duradero riba e bidanan di studiante, segun investigadonan na ResearchNed a conclui despues di studia e impacto di e programa Erasmus+. Cinco aña despues di nan stage of estudio den exterior, 97% di hende cu a participa den e programa a bisa cu ainda e tin un efecto positivo den nan bida personal, y 89% a bisa mescos tocante nan bida profesional. E investigadonan a describi esaki como un “engrandecemento di experencia adolescente.”

Cada aña, casi 15,000 studiante di universidad ta biaha afo pa un stage of intercambio di estudio. ResearchNed a papia cu 566 studiante tocante nan experencia cu Erasmus+ cinco aña despues di a experencia esaki.

Casi tur (97%) a reporta un influencia positivo den nan bida personal. “E programa di Erasmus+ a duna mi hopi bista den ken mi ta y kico mi kier haci. El a introduci mi na otro manera di studia, traha y biba. Y a haci mi mas feliz y mas independiente,” un ex-studiante a bisa.

Ex-participantenan a duna e programa un 8.4 riba e scala di impacto pa e efecto general di nan experencia den exterior riba nan bida personal. 84% a bisa cu el a influencia nan desaroyo personal, 80% a bisa cu el a mehora nan independencia, 65% a bisa cu el a duna nan mas flexibilidad den situacionnan nobo y 64% a bisa cu el a mehora nan habilidadnan social.

Pa loke ta e efecto riba nan carera, ex-studiantenan a duna Erasmus+ un 7.5 riba e scala di impacto. Hopi di e habilidadnan obteni cu nan a menciona pa nan bida personal tambe ta afecta nan bida profesional positivamente. Hopi tambe a menciona habilidad di comunicacion y colaboracion den un contexto internacional (56%) y un actitud habri y interesa (46%).

Studiantenan tambe a bisa cu nan contactonan internacional a enrikece nan bida y a promove nan carera. “Bo ta bira mas habri pa otro cultura. E ta pone bo compronde y bira tolerante na hende cu un storia diferente. E ta haci’e mas facil pa mi pa colabora cu coleganan den exterior den mi trabao actual na un instituto di investigacion internacional,” un ex-studiante a bisa.