(NLTimes) – Mamanan, hasta esnan cu un antecedente atletico fuerte, ta enfrenta retonan significante pa mantene un rutina deportivo regular despues di nacemento di nan prome yiu, un estudio nobo di Instituto Mulier a haya. E investigacion ta destaca cu e expectativanan di sociedad rond di maternidad, hunto cu e exigencianan fisico di embaraso y parto, hopi biaha ta hacie dificil pa hende muher haya tempo y espacio pa haci ehercicio.
Di acuerdo cu e estudio, un di e bareranan clave pa e condicion fisico despues di parto ta e norma social cu ta pone e responsabilidad di cuido di yiu principalmente riba e mamanan. E expectativa aki, investigadornan ta bisa, ta conflicto cu e tempo y energia necesario pa mantene un rutina deportivo regular. “Mamanan y nan partnernan ta trata esaki di varios manera,” e rapport a bisa. E resultadonan ta basa riba entrevistanan profundo cu 22 mama cu anteriormente tabata activo den deporte.
Mientras cu haya tempo pa deporte por ta crucial, e estudio ta destaca tambe cu no ta trata solamente di e cantidad di tempo disponibel. Loke ta importa ta e calidad di e tempo ey — un periodo liber di distraccion y interupcion. Sinembargo, loke ta cualifica como tempo “suficiente” y “apropia” pa ehercicio ta varia di un mama pa otro, dependiendo di su metanan deportivo specifico y estilo di bida.
E investigacion tambe ta explora con normanan social y di genero ta impacta e habilidad y deseo di hende muher pa sigui haci ehercicio den e periodo despues di parto. E estudio ta sugeri cu e organisacion y priorisacion di deporte no ta simplemente escogencianan individual, pero ta profundamente influencia pa normanan y expectativanan di sociedad pa loke ta trata maternidad y rolnan di genero.
E peso fisico di embaraso tambe ta hunga un rol crucial den e retonan cu mamanan nobo ta enfrenta ora nan ta purba di regresa na deporte. Segun e estudio, hende muher na estado mester interumpi nan rutinanan regular di fitness, y e proceso di recuperacion despues di parto ta complica nan habilidad pa participa den actividadnan fisico mas ainda. Como resultado, hopi mama ta experencia frustracion y dificultad pa reintegra ehercicio den nan rutinanan unabes cu nan a recupera di parto.
E decision pa reanuda deporte despues di parto, segun e estudio, ta depende di un combinacion di factornan. Ademas di limitacionnan di tempo y limitacionnan fisico, otro consideracionnan ta inclui experencianan deportivo di pasado, balornan personal tocante di condicion fisico, y e grado di sosten di un partner. E elementonan aki colectivamente ta forma e habilidad di un mama pa reintroduci deporte den su bida despues di parto.
