Estudio: Menos cu 10.000 stap pa dia por ofrece ainda beneficionan di salud significante

(NLTimes)—Pa tuma 10.000 stap pa dia ta un meta pa hopi hende. Sinembargo, segun e investigacion publica diahuebs siman pasa pa Radboudumc, pa tuma menos stap tambe por reduci e riesgo pa morto prematuro y malesa cardiovascular. E investigadonan a subraya cu esaki no kiermen cu hende por ta menos activo.

E cientificonan a analisa data for di 12 estudio internacional envolviendo mas di 110.000 participante. E resultadonan a sugeri cu e riesgo di morto no ta sigui baha despues di 8.800 stap pa dia. Pa malesanan cardiovascular, no a observa ningun reduccion adicional di riesgo despues di 7.100 stap. E descubrimentonan di e estudio ta cuadra cu e investigacion recien, cual ta mustra cu e plateau di beneficio pa salud ta menos di 10.000 stap pa dia.

“Loke ta pone nos investigacion apart ta cu nos ta provee metanan cla pa prome biaha,” segun investigado Niel Stens a splica. “Nos ta mustra cu beneficionan pa salud por ser obteni por medio di cana 2.500 stap pa dia. Y cu cada 500 stap adicional ta mehora bo salud. Esaki ta bon noticia pasobra no tur hende por cana casi 9.000 stap pa dia.”

E estudio no ta revela ningun diferencia entre homber y muhe. Sinembargo, canando mas lihe por ofrece beneficionan adicional, no importa e cantidad total di stap tuma pa dia. Segun e lider di investigacion, Thijs Eijsvogels, pa yega 9.000 stap no mester ta e punto final: “Den cualkier caso, mas stap tuma no ta haci cos pio. Ademas, nos estudio a investiga solamente e influencia riba e riesgo di mortalidad en general y malesa cardiocasvular. Canando, of ehercicio en general, ta provee mucho mas beneficio. Pensa, por ehempel, di mehora bo calidad di drumimento y salud mental. Y esaki ta disfrutabel tambe!”

Eijsvogels a enfatisa cu e estudio ta diseña pa provee hende cu metanan claro y realistico. E Organisacion pa Salud Global ta recomenda al menos 150 pa 300 minuut di ehercicio tur siman pa adultonan. Sinembargo, Eijsvogels a splica cu hopi hende no ta sigur kico ta constitui ehercicio modera-intenso: “Contando stap ta hopi mas facil, specialmente mirando cu mayoria hende tin un smartphone of smartwatch,” el a conclui.