Estudio: Hende homber di edad medio tin mas chens pa comete suicidio

(NLTimes)—Tin 14.4 biaha mas suicidio entre hende homber di edad medio bibando nan so cu tin problemanan di salud mental y ta ricibi beneficio di descapacidad compara cu otro hende homber di edad medio. Esaki a ser reporta pa 113 Suicide Prevention despues di un estudio den colaboracion cu e Trimbos Institute. Ademas, e investigadonan a subraya cu e taboo rondonando salud mental y suicidio entre hende homber mester kibra.

Cuatro di dies hende cu muri pa suicidio na Hulanda ta hombernan di edad medio. “Esaki ta haci hombernan di edad medio e grupo mas grandi den cu riesgo di suicidio na Hulanda,” segun 113 Suicide Prevention.

E estudio a uza data for di CBS Hulandes, e institutonan di GGZ y encuestanan completa pa famianan envolvi. For di 2013 pa 2021, 6,656 hende homber entre e edadnan di 40 pa 70 aña ta muri di suicidio na Hulanda.

Dentro di e grupo aki, e factor mas importante ta cu hende homber cu tin problemanan di salud mental, cu ta ricibi beneficio di descapacidad, desempleo of social, ta soltero, viudo of divorcia, tin problemanan di salud fisico of tin salario abao. Ora varios factor bin hunto, e riesgo di suicidio por aumenta significantemente.

Sinembargo, e estudio tambe ta mustra cu rond 41% di hende homber cu ta muri pa suicidio tabata emplea, segun 113 Suicide Prevention. Un cantidad halto di suicidionan entre hende homber di edad medio a ser registra den e sectornan di transporte y deposito, rental y otro servicio di empresa en particularmente.

For di e encuestanan completa pa sobrevivientenan, ta claro cu e homber cu a comete suicidio frecuentemente no a mira un salida pasobra nan tabata preocupa tocante nan finanzas, nan relacion, nan famia, of problema fisico. Algun no a busca ayudo pa nan problema pasobra esaki tabata taboo of nan no tabata kier ta dependiente riba otro. Problema psicologico manera malesa mental, adiccion of consecuencianan emocional debi na experencianan traumatico durante infancia of morto tambe por hunga un rol den suicidionan entre e hende hombernan aki, segun famianan ta bisa.