Anticuerponan cu hende ta traha pa combati e novel coronavirus ta dura pa al menos cuatro luna despues di diagnostico, y no ta desaparece rapidamente manera reportenan anteriormente a sugeri, cientificonan descubri.

E reporte ayera, di test haci na mas di 30mil persona na Iceland, ta e estudio mas extenso te awo riba e respuesta di sistema immuun na e virus a traves di tempo, y ta un bon noticia pa esfuersonan pa desaroya vacuna.

Si un vacuna por stimula produccion di anticuerponan duradero manera infeccion natural ta parce di haci, ta duna speransa cu ‘inmunidad na e virus impredecibel y altamente contagioso aki por ta duradero’, cientificonan di Universidad di Harvard y Institutonan Nacional di Salud Mericano a skirbi den un comentario publica cu e estudio den e New England Journal of Medicine.

Un di e misterionan mas grandi di e pandemia ta si infeccion cu e coronavirus ta yuda protege contra infeccion di nobo den futuro, y con largo. Algun estudionan mas chikito anteriormente a sugeri cu anticuerponan por desaparece rapidamente y cu algun hende cu tiki of ningun sintoma por no traha anticuerponan en absoluto.

DeCODE Genetics basa na Reykjavik, un subsidiario di compania biotecnologico Mericano, Amgen, a realisa e estudio cu varios hospital, universidad y oficialnan di Salud na Iceland. E pais a test 15% di su poblacion for di fin di februari, momento cu a haya e prome casonan di Covid-19, dunando un base solido pa comparacion.

Cientificonan a usa dos tipo diferente di test di coronavirus: esun cu ta detecta parti di e virus via swab di nanishi of otro muestranan, indicando infeccion; y test cu ta midi anticuerponan den sanger, cu por mustra si un persona tabata infecta actualmente of den pasado.

Muestranan di sanger a wordo analisa di 30,576 persona usando varios metodo, y a conta un persona como un caso si al menos dos di e test di anticuerpo tabata positivo. Esakinan a inclui un variedad di hende, di esnan sin sintoma te hende hospitalisa cu señal di Covid-19.

Den un sub-grupo cu a test positivo, mas test a haya cu anticuerponan a aumenta pa dos luna despues di diagnostico inicial di infeccion, y despues a plateau y keda stabiel pa cuatro luna.

Estudionan anterior sugeriendo cu anticuerponan tabata desaparece rapidamente por tabata mirando unicamente e prome ola di anticuerponan cu e sistema immuun ta traha den respuesta na infeccion; e estudionan ey mas tanto a mira 28 dia despues di diagnostico. Un segundo ola di anticuerpo ta forma un luna of dos despues di infeccion, y esaki ta parce mas stabiel y duradero, e investigadonan ta reporta.

E resultadonan no ta nifica necesariamente cu poblacion di tur pais lo ta mescos, of cu tur persona tin e tipo di respuesta aki. Otro cientificonan recientemente a documenta sikiera dos caso unda hende ta parce di ta infecta di nobo cu coronavirus varios luna despues di nan prome infeccion.

E estudio nobo tambe a descubri:
— Test mediante e metodo di busca parti di e virus, comunmente usa den escenario comunitario, no a detecta casi mita di hende cu tabatin e virus segun a descubri usando e test di anticuerpo den sanger. Esey ta nifica cu test di sanger ta hopi mas confiabel y miho pa track transmision di e malesa den un region, y pa guia decisionnan tocante bolbe trabou of scol, segun e investigadonan.

— Casi un tercera parti di infeccion tabata hende asintomatico.

— Casi 1% di poblacion di Iceland tabata infecta den e prome ola di e pandemia, nificando cu e otro 99% ainda ta vulnerabel pa e virus.

— Tasa di fatalidad di infeccion tabata 0.3%. Esey ta alrededor di 3 biaha e tasa di fatalidad di grip di temporada, y den linea cu otro calculacionnan mas recien, segun Dr. Derek Angus, hefe di cuido critico na Centro Medico di Universidad di Pittsburgh.

Maske hopi estudio ta reportando tasa di mortalidad basa riba gruponan specifico, manera pashent hospitalisa, e tasa di mortalidad entre tur hende infecta cu coronavirus tabata desconoci. E noticia cu anticuerponan natural no ta desaparece rapidamente ‘lo curasha hende trahando riba vacuna’, Angus a bisa.