VHR a bira un proveedor importante den e sector turistico di Aruba. Vacation Home Rentals (VHR) ta representa 11% di e abastecemento di vivienda y 28% di e turistanan cu ta keda un tempo na Aruba. E pueblo di Aruba ta positivo ariba efecto di turismo na e isla, pero ta preocupa pa e consecuencianan riba e costo di bida, medio ambiente y e accesibilidad economico di vivienda.

Segun e estudio di e efectonan economico di VHR na Aruba, debi na e caracteristicanan di e economia di Aruba y di e sector VHR local, e desbentaha ta pisa mas. Ademas, tin indicacion cu e cumplimento di e sector VHR ta keda cortico. Por lo tanto, ta rekeri politicanan cu ta reduci e consecuencianan adverso pa e sociedad.

Proveedor mas grandi di camber

Segun data di Centrale Bank van Aruba (CBA), VHR a suministra 7.615 camber den 2022, esaki ta implica cu VHR ta ofrece mas camber cu hotel y timeshare. E oferta di VHR, segun CBA, ta coresponde na 3.413 unidad di huur y e 28% di e anochinan cu turista a keda na Aruba.

E estudio ta indica cu Aruba Tourism Authority (ATA) ta calcula e cantidad di unidad di e mesun aña ey na 4.203. Pa comparacion, e abastecemento di vivienda tabata consisti di 387.380 unidad na 2020.

Prijs mas abao

E tarifa promedio pa dia di VHR ta mas abao cu esun di e hotelnan tradicional. E tarifa promedio pa dia den timeshare y VHR si ta comparable. Un tarifa promedio pa dia mas abao ta permiti un estadia mas largo. Segun e estudio, 28% di turistanan cu ta keda ma cu un anochi na Aruba ta keda den un VHR, mientras cu solamente 22% di turistanan cu ta yega ta keda den VHR.

Esaki ta implica cu estadianan den VHR ta dura alrededor di 25% mas largo. Mester señala cu e tarifa promedio pa dia di VHR ta ser aplica na e propiedad na luga di e cambernan.

E criticonan ta argumenta cu e prijsnan abao ta debi na e incumplimento di regulacion. Nan ta afirma cu e impuesto di turista no ta ser paga completo y cu VHR ta paga tarifanan residencial na luga di tarifa comercial pa servicionan publico.

Si esaki ta e caso di berdad, e estudio ta enfatisa, Aruba tin e mesun problema cu e falta di cumplimento cu ta ser informa den e literatura internacional.

Menos ocupacion

E estudio ta señala cu VHR tin un ocupacion considerablemente mas abao cu hotelnan tradicional. Mientras cu e hotelnan ta completamente yen durante temporada halto (high season), no mas cu dos tercera parti di VHR disponibel a wordo ocupa den e añanan 2019-2022.

Den 2022 e ocupacion di VHR tabata varia entre 45% den temporada abao (low season) y 66% de temporada halto (high season).

Ingreso

E sector VHR ta genera un gran actividad economico. E estudio ta remarca cu e ingreso di e reserva di VHR a subi na 153 miyon di dollar den 2022. Vacation Rentals Profesionals Aruba (VRPA) a encarga un estudio ariba e balor agrega di e sector na e economia di Aruba.

E estudio aki a tene na cuenta un variedad grandi di efecto. Prome el a calcula e balor di e reserva y a haci un suposicion ariba e gasto di turismo basa den data historico. Na di dos luga, el calcula e efectonan indirecto cu ta por ehemplo, e actividadnan di e proveedornan hotelero. Y na di tres luga, el a pinta e mapa cu e efectonan induci. Esaki ta referi na e gasto di personanan cu ta percibi ingreso di e sector VHR.

E estudio a calcula cu e sector a representa 479 miyon di dollar di actividadnan economico den 2021. (5.635 trabao). E balor agrega a ser calcula na 230 miyon dollar. Esaki ta ekivalente na 7% di e PIB (Producto Interno Bruto) den 2021.

Debi na e combinacion di efectonan directo y indirecto y efectonan induci, e calculacion aki ta optimista.

Limite inferior

E tabel comparti (links) ta basa ariba data di AirDNA, cu ta tene na cuenta unidadnan di Airbnb y Vrpo. Den luna di maart, e estudio ta menciona, tabatin 3.496 unidad di huur disponible den e database aki. Esaki ta mas abao cu e 4.203 cu ATA a menciona pa 2022.

E cifra di ATA ta basa ariba e database Transparent y esaki ta inclui unidadnan di Booking.com y TripAdvisor, adicional na e unidadnan di Airbnb y Vrbo. Ademas, algun parti di Aruba no ta registra den AirDNA. Pesey e cifranan den e tabel comparti mester ser considera manera un limite inferior.

Noord

Mayoria di e unidadnan di huur di Airbnb y Vrpo ta situa den Noord. Esaki kiermen cu e mayor parti di e oferta ta concentra den areanan unda turismo ya caba ta desaroya. Tin 2.083 unidad di huur na Noord, di un abastecemento di 7.971.

Casnan completo riba plataformanan di VHR a compromete 25% di e viviendanan existente den 2020.

Reserva pa hopi dia

Un gran proporcion di e unidadnan di huur na tur e regionnan tabata reserva pa mas di 90 dia den e aña anterior cu e data a ser colecta. Segun e legislacion local (ROPV articulo 4.3) sinembargo, cas y apartamento residencial por ser usa cu obhetivo recreativo pa un maximo di 90 dia.

E estudio ta enfatisa cu tin preocupacion tambe cu tin falta di cumplimento di esaki, locual ta consistente cu e literatura internacional.

Literatura internacional den e contexto di Aruba

Aunke VHR por genera ingreso turistico adicional, e estudio ta remarca cu e sector tin efectonan grave riba e mercado di vivienda, den un parti debi na su naturalesa comercial. Ta existi diferente caracteristicanan relevante cu ta determina e ekilibrio entre e efectonan positivo y negativo di VHR.

E tabel comparti (rechts) ta presenta e data relaciona cu e contexto di Aruba. E tabel ta numera e conclusionnan extrai di e data.

E sector di VHR tin un caracter comercial y actualmente ta ocupa 11% di e abastecemento di vivienda. Aunke e sector VHR ta permiti e alohamento di mas turista, y aunke e poblacion ta positivo ariba turismo en general, e poblacion tambe ta preocupa ariba e efectonan di e turismo ariba e costo di bida y accesibilidad di vivienda. E efectonan negativo ta pisa fuertemente y tin necesidad pa un politica.