Streaming di video y weganan di definicion halto por resulta den emision significante di gas di invernadero, dependiendo di e tecnologia usa, segun un estudio cu sosten di gobierno Aleman revela ayera.
E reporte publica pa agencia federal Aleman di medio ambiente a calcula e cantidad di carbon dioxide produci pa centronan di data unda ta almacena material pa streaming, y pa e tecnologia di transmision usa pa trece esaki cerca consumidornan.
A conclui cu streaming di video riba cablenan fiber optic ta resulta den e menor cantidad di emision di CO2 – 2 gram pa ora. Usando cable di koper ta produci dobel e cantidad ey, mientras tecnologia 3G ta resulta den 90 gram di CO2 pa ora.
Autornan di e reporte a bisa cu streaming riba tecnologia mobil di proximo generacion, conoci como 5G, lo resulta den emision di carbon dioxide di 5 gram pa ora, sugeriendo cu un lansamento amplio por yuda reduci consumo di energia.
Mientras tanto, centronan di data a conta pa un parti chikito di e uso total di energia, maske e cantidad a varia significantemente dependiendo di con eficientemente a usa y almacena servernan, segun e reporte.
Presentando e reporte, minister di Medio Ambiente Aleman, Svenja Schulze a bisa cu e estudio tabata un intento pa yuda provee data solido pa esnan cu ta tuma decision mientras infrastructura general ta bira cada bes mas importante, na mes momento cu paisnan ta purba di reduci emision di gas di invernadero cu ta kenta atmosfera.
“Ta posibel pa stream data sin tin un impacto negativo riba clima, si bo hacie corectamente y scoge e metodo corecto pa transmision di data”, el a bisa. “For di perspectiva ambiental, lo ta un bon idea pa set up mas hotspot di WiFi publico, ya cu esaki ta mas amigabel pa medio ambiente cu streaming riba rednan mobil.”
