Ayera mainta na edificio di Post Aruba N.V. a tuma luga e anuncio di e director nobo di e compania estatal Post Aruba N.V., Sra. Esther Emerencia-Gomes. Hunto cu minister di Finanzas, Economia y Sector Primario, Geoffrey Wever y presidente di Raad van Commissarissen Antonio Carlo, Sra. Emerencia-Gomes a firma e acuerdo laboral como director nobo di Post Aruba.

“Mi ta sumamente contento cu nos a yega na e momento aki. Despues di un trayecto largo, nos a yega na e conclusion cu Esther Gomes ta e miho persona pa guia Post Aruba NV den e añanan binidero,” minister Wever a expresa.

E mandatario a elogia e director nobo indicando cu Sra. Emerencia-Gomes a demostra den su funcion anterior di tabata un manager legal cu a cumpli cu tur e tareanan cu a ser rekeri di dje y esey mes, el a remarca. “Nos a wak Esther perform, nos a wak su determinacion, su profesionalismo y mi ta sinti di berdad hopi contento y hopi orguyoso di bisa cu esaki ta nos director nobo di Post. Un persona hoben, un ser femenino cu a demostra cu e por,” el a enfatisa.

Na mesun momento minister Wever a pidi tur empleado pa duna Sra. Emerncia-Gomes espacio y confiansa pa e por guia e compania den e añanan binidero y a resalta cu e tin tur bon interes di cada empleado y di e empresa, y sigura cu Gobierno di Aruba tin pleno confiansa den e capacidadnan di e director nobo.

“Danki na Esther pa acepta e reto aki pasobra empresa Post mester di cambio, mester inversion, mester direccion nobo, mester un vision nobo y pa Esther tuma e responsabilidad aki ta un muestra cu e tin pasion pa Post, e tin e interes di cada un na su pecho y e ta bay traha incansablemente pa guia Post den e proximo fase,” minister Wever a subraya.

Presidente di Raad van Commissarissen, Antonio Carlo, a splica cu e hunta a sigui e procedura adecua pa loke ta e seleccion di e director nobo. El a indica cu nan formula un profile di e funcion y a sigui un procedura di solicitacion interno pa cu esaki y despues di a sigui e procedura completo a eligi Sra. Emerencia-Gomes como e candidato ideal pa e funcion.

“Esther ta un persona cu ta enfoca riba relacion dipersonal, e ta un persona cu ta semper cla pa yuda, su conocemento di ley ta importante pa e retonan di Post Aruba. E ta posee calidad di unificador y ta mantene bon relacion cu stekeholders di Post manera sindicato, minister, empleado, cliente y muy en particular cu miembronan di management team,” Carlo a indica.

El a remarca cu Sra. Emerencia-Gomes no ta un hefe di trabou cu kier haci tur cos su so, pero ta un hefe di trabou cu por delega trabou, duna stimulacion y duna direccion unda ta necesario.

El a enfatisa cu Sra. Emerencia-Gomes a hunga un papel importante den formulacion di e transformatieplan di Post Aruba N.V. y a tuma responsabilidad pa e transformacion tan necesario di Post Aruba.

Por ultimo, Carlo a indica cu e siguiente pasonan ta bay ehecucion di e transformatieplan y finalisacion di cuentanan anual di Post Aruba N.V..

Sra. Emerencia-Gomes a expresa cu pa su persona e ta un honor pa por acepta e funcion di director di e compania estatal. El a subraya cu e ta completamente consciente di e desafionan cu tin, pero na mesun momento el a sigura cu su curason ta yena cu gratitud pa e confiansa deposita den su persona.

“Mi ta tuma esaki cu hopi seriedad y mi sa cu reconocemento ta bin cu responsabilidad y mi ta tuma e responsabilidadnan ey riba mi persona pa lidera locual ta e famia postal aki. Siete aña pasa ora cu mi a pasa door di e portanan di Post, mi no a imagina cu e caminda lo a yega akinan. Mi a conoce cada un di mi coleganan y mi ta aprecia y balora cada un di boso. Mi ta agradecido na e management team cu a sa di pasa den e temporada di transicion di liderazgo aki hunto cu mi, y specialmente na Romonsito Croes cu ta mi co-piloto. Sin boso sosten e momento aki no lo por tabata posibel,” el a indica.

Sra. Emerencia-Gomes a remarca cu e trabou ta n reto y cu e ta completamente prepara pa asumi esaki. “Mi kier bisa cada persona como miembro di e famia di Post Aruba N.V. mi persona hunto cu e team di managers por forma un vision y un mision, nos por bin cu hopi plan pero nos ta depende di cada un di boso prestacion pa nos por realisa pasobra solamente hunto nos lo sa di tin exito,” el a agrega.

Na mesun momento el a menciona cu recientemente Post Aruba N.V. a firma un CAO historico despues di hopi aña creando asina un perspectiva nobo pa cada un empleado di Post Aruba N.V.

“Mi ta sumamente orguyoso di e trabou cu nos a sa di eherce y mi ta sigur di locual cu ta nos dilanti, e plannan cu nos lo sa di ehecuta cu determinacion y confiansa cu e rumbo cu nos ta bay aden ta uno cu lo hiba nos door di un proceso di sanidad…Unda cu tin herida ta un proceso doloroso tin biaha pa por sana esaki, pero nos sa cu e ta uno necesario. Y cu e confiansa cu a pesar tin biaha e por haci dolor, nos sa y nos ta pone nos dilanti cu e meta final ta e sanidad. Mi ta spera cu mi por conta cu cada un di boso sosten pa asina ey garantisa e exito y e futuro di Post pa cada un di nos,” Emerencia-Gomes enfatisa.