Diasabra henter dia a dedica na e transporte di e estatuanan for di tayer di e artista na Turibana, pa nan luga riba e monumento na Plaza Padu na Oranjestad. Mas cu 12 ora a tuma pa por a keda cla.

Manera a keda anuncia, for di mainta tempran a bay cerca artista Ciro Abath pa realisa e transporte di e estatuanan na un manera masha cuidadoso. E vehiculo di carga a haya asistencia di Cuerpo Policial cu a habri caminda y a yega safe na Playa. Pa medio di un grua y cu ayudo di varios persona, a lanta e piesanan cu precaucion pa pone nan riba e plaza. For di eynan a cuminsa cu e trabou di instalacion.

Loke inicialmente a pensa di ta bay tuma djis un par di ora, a converti den un hazaña cu a transcuri durante henter mainta, atardi y comienso di diasabra anochi. E motibo ta hustamente e atencion cu a pone na tur detaye, for di con ta cubri e estatuanan y con ta pone nan riba e truck, te na con nan ta wordo baha bek y instala na e posicion final. Plaza Padu tin un importancia sumamente grandi no solamente pa dedica e honor aki na Padu Lampe pa tur loke e ta nifica pa Aruba, pero tambe naturalmente pasobra e inauguracion di e plaza ta e coronacion di renobacion di centro di ciudad y di e restauracion di centro di gobernacion.

Prome Minister Mike Eman ta gradici tur esnan cu a forma parti di e esfuersonan di diasabra ultimo. E ta hopi orguyoso di e aporte cu cada persona a pone pa logra haci e trabou. Ciro Abath y su ekipo, pero tambe tur esnan di su Ministerio cu a duna un man, na Cuerpo Policial y tambe Departamento di Obranan Publico (DOW). E mandatario a expresa e sentimento aki personalmente na cada un den oranan di anochi ora cu a keda cla.

Mientras tanto e trabounan ta continua den preparacion pa e ceremonia grandi di inauguracion cu tin programa pa diabierna awo 17 di maart. For di 6or di atardi e ceremonia ta cuminsa y ta consisti di diferente aspecto manera presentacion di nos artistanan local, presencia di e propio Padu Lampe y e gran desvelo di e estatuanan di su persona hunto cu co compositornan di nos himno nacional, Rufo Wever y Lio Booi.