(AP) – Rednan social ta yen di estafadornan cu ta priminti ganashi garantisa riba inversionnan y clientenan a perde biyones di dollar aña pasa.
Troy Gochenour, di 50 aña, a perde 25,800 dollar incluyendo 15,800 den placa presta, den un estafa di criptomoneda cu a cuminsa cu un mensahe di WhatsApp. “Mi a caba di muda pa bolbe cuminsa mi bida, despues di purba exito den entretenimento na New York y mi tabata sinti miso,” Gochenour a splica. “Mi a cuminsa busc pareha online y despues mi a ricibi un mensahe riba WhatsApp cu a cuminsa tur cos.”
Estafanan financiero, incluyendo di criptomoneda, a costa clientenan mas o menos 3.8 biyon dollar aña pasa solamente na Merca segun Federal Trade Commission, cual ta dobel compara cu aña 2021. E tipo di estafanan aki ta un problema global tambe.
Esunnan trahando den e espacio, incluyendo FTC y Better Business Bureau, a bisa cu e velocidad y conveniencia di internet, e aumento di plataformanan di pago online y aplicacionnan ademas di e plamamento di mal informacion financiero tur a contribui na e aumento aki. Tambe nan ta cita e era di pandemia cu a causa isolacion y soledad.
Den Gochenour su caso, el a pasa varios siman ta intercambia mensahe cu un persona cu a aparenta di ta interesa den dje romanticamente prome cu el a trece dilanti loke ta yama ‘liquidity mining.’ Aunke e no tabata un fanatico di criptomoneda prome cu esaki, eventualmente el a cuminsa sigui su consehonan y instruccionnan. Estafadornan manera esun di Gochenour a desaroya habilidadnan den crea sitionan web cu ta mustra convincente y como si fuera companianan di criptomoneda legitimo. Despues cu el a crea un cartera di criptomoneda, e placa cu e tabatin a cuminsa crece manera cu e estafador a bisa. “Mi tabata pega na e persona aki,” el a conta. “Y prome el a mustra como si tur cos ta funcionando. El a bisa cu ‘nos por ta hunto y genera tur e placa aki’.”
Despues un dia, ora cu el a transferi 5,000 dollar di su mesun placa na e cartera, el a lanta pa revisa su balans y e placa no tabata den su cartera mas. Ora cu el a mira un website unda e estafador a dirigi su persona, pa purba compronde kico a pasa, el a mira un contract. El a contacta e estafador ken a bise pa tuma contacto cu servicio pa cliente, unda nan a bise cu e mester pone 10,000 dollar mas pa e por ricibi su placa back. El a sigui pone placa den su cartera cada bes cu nan tabata bise pa haci esaki, y aunke cada baha e tabata perde e placa back, eventualmente a mustra comos i e lo haya 200,000 back den su cuenta. “E cifranan tabata manipula, tur tabata falso.”
Mayoria di e ofertanan aki pa inversion cu ta un estafa en realidad lo mustra facil, lihe y cu riesgo minimo. Hopi ta trata tambe benta di propiedadnan, criptomoneda, coachnan financiero of oro. Tipicamente, e compania ta usa palabranan manera “proven (comproba)” y “guaranteed (garantisa),” cnohuntamente cu supuesto testimonionan di personanan bisando cu nan a haya beneficionan grandi di e saki. Esakinan hopi biaha ta testimonionan inventa of paga, segun Melanie McGovern, director di relacionnan publico pa Better Business Bureau.
“Tene cuenta cu e testimonionan aki,” McGovern a conseha. “Y sa ken ta bo amistadnan. Si bo haya un mensahe cu ta dudoso for di un persona cu cuenta, specialmente un persona di ken bo tin hopi tempo sin tende, acerca nan via otro plataforma y confirma si realmente ta nan.”
E ofertanan tambe usualmente ta bini cu un presion di tempo; pues bisando pa bo “genera placa lihe” of cu e ta un “oportunidad unico”. Of nan por ta pasonan elabora cu ta rekeri infusion di mas placa na cada etapa, manera esun cu Gochenour a experiencia. E estafador tipicamente ta pinta e imagen di con bida lo ta ora bo haya placa. Pero ningun persona por garantisa esaki, y e persona cu priminti un inversion sin riesgo, ta un fraude.
Si bo ta sospecha cu un oferta ta un estafa di inversion, prome bo mester investiga e oferta. E estafadornan lo kier pone presion, kiermen tuma bo tempo y busca online pa e nomber di e compania conhuntamente cu palabranan clave manera estafa, testimonio of kehonan. Di dos, consulta e informacion cu sea un amistad of un consehero. Posiblemente un persona cu bo conoce a yega di haya un oferta similar, specialmente mirando cu estafanan hopi biaha ta ataca personanan di un comunidad en specifico.
Tambe no acepta ningun oferta cu bo no a pidi. Si bo haya cualkier yamada diripiente, mensahe of e-mail tocante un “oportunidad di inversion” e ta un estafa. Y por ultimo, rechasa e presion cu nan pone riba bo. “Un compania legitimo lo laga bo persona tuma bo tempo pa investiga prome cu bo inverti placa,” McGovern a informa.
Estafadornan tambe lo exagera e significancia di eventonan actual, siguiente e noticianan y purbando di trece dilanti nan oferta di acuerdo na loke ta tendencia. Pa medio di haci un oportunidad mustra emocionante of innovativo nan ta spera cu e victima lo compromete sin cu e ehecuta algun investigacion.
Un di e señalnan principal di ora e ta un estafa di inversion den criptomoneda ta ora e estafador ta pidibo pa manda e placa adelanta sin cu nan dunabo un bon motibo pa esaki, FTC a adverti. Hopi biaha e estafador lo alega cu e pago aki ta pa cumpra algo necesario pa haya bo placa back of pa proteha e placa cu bo a inverti caba di algun manera. Gochenour a experiencia varios di e versionnan aki. “Nunca mescla un pareha online cu cosnehonan di inversion,” e agencia a sigui conseha. “Si bo conoce un persona online, y nan kier mustrabo con pa inverti den criptomoneda of ta pidi pa bo manda nan criptomoneda, e chens ta sumamente grandi cu esaki ta un estafa.”
McGovern a comenta cu e escala real di e perdidanan cu e victimanan ta sufri ta hopi mas grandi di loke ta reporta a causa di berguensa cu e victimanan ta sinti ora di posiblemente reporta estafanan y berguensa cu e hecho cu nan a cay victima na un di esaki, pues nan kier sconde e resultado for di amistadnan y familiarnan. Pero tambe a encurasha hende reporta e estafanan cu nan experiencia na instancianan of agencianan cu ta lidia cu esaki manera BBB, CFPB, FTC y Internet Crime Complaint Center.
