Estado ciclico di historia explora den exposicion ‘Power & Ancestors’

Pa Arturo Desimone, curator Rubiano di exposicion ‘Power & Ancestors’ na Gallery WM Amsterdam, e importancia pa nos como sociedad tin mas conexion cu nos raiznan ta importante pa tin mas solidaridad pa ‘hende cu ta pasando den mesun cos’. E ta señala cu eventonan den historia ta ripitiendo actualmente mas lihe di loke ta aparenta.

Sr. Desimone hunto cu Sebastian Rypson ta curatornan di e exhibicion na Amsterdam cu 14 artistanan internacional y Hulandes. E exposicion manera nos a trece dilanti anteriormente ta enfoca riba e poder cu tin den conecta cu antepasadonan pa tanto pueblonan cu tabata oprimi como e banda di medaya di aristocracia Europeo.

Den un cultura post moderno unda tecnologia ta haci nos bida bay na velocidad hopi mas halto cu tabata posibel antes e exposicion colectivo ta trece dilanti cu tur e tecnologia aki ta solamente sirbi pa distancia nos di nos ancestronan.

‘Loke a pasa den historia ta pasando actualmente’
Pero esaki no ta nifica algo solamente pa nos contexto personal, si no cu segun e curator hopi cosnan cu ta pasando a perde nan contexto. Sr. Desimone ta pone enfasis riba e manera con pa hopi eventonan tumando luga, ta parce manera nos a lubida e historia di esakinan, dunando ehempel di guera di Iraq cu a tuma luga no mucho tempo pasa.

Asina e ta señala cu e importancia di conexion cu antepasadonan ta den realisa e cualidad ciclico di historia y eventonan tumando luga actualmente. “Cosnan cu ta pasando awo na Europa, por ta tempo pasa a tuma luga na Latino America. Algo cu ta hungando un rol importante na Africa actualmente Merca lo por a pasa den dje caba.”
E artistanan cada un individualmente ta trece nan inspiracion propio di nan antepasadonan den nan obranan. Sr. Desimone ta conta con el a haya interes den e trabou di e artista Surnameño Xavier Robles de Medina. E obra cu a hala sr. Desimone su atencion particularmente pa e exposicion actual ta uno unda e artista ta sketch un pueblo indigena na Surnam cual nan a hundi pa traha un dam hidroelectrico.

Imagennan cu peso historico manera esaki ta e estetica cu ta particularmente interesante pa e exposicion. Pero sr. Desimone ta aprecia e manera con artistanan manera sr. Robles de Medina ta trece temanan cercano na activismo pero sin haci esaki di manera ‘forsa’, manera e ta haya tin tendencia den mundo di arte actualmente.
Comercialisacion di historia di antepasadonan
E tema di autenticidad aunke no ta un tema central di e exposicion, ta importante pa tanto e artistanan como e curatornan. Un artista cu a haya su mes envolvi den un polemica por accidente pero cual ta ilustra netamente kico e exposicion ta para pe ta Rotem Bides, artista Israelita. Sra. Bides durante su bishita na e sitio di e Auschitz Memorial.

Sra. Bides kende manera sr. Desimone ta conta nos ta descendiente directo di e personanan cu a scapa e holocaust, lo a hiba algun artefacto di e luga sin realisa e importancia di esaki pa e coleccion di e museo. Sinembargo pa sr. Desimone e ta keda interesante pa mira con e museo mes ta haciendo un operacion comercial masivo cu e historia di antepasadonan di ambos sra. Bides como sr. Desimone.

E museo a crea un polemica, pero no tabata intencion di e artista pa ‘horta’ e artefactonan. P’esey e artista su docentenan na su academia di arte a defende tambe, te cu a duna bek e artefactonan pa e museo su coleccion. Pero casi manera un monumento cu a perde su substancia, e artista ta expone entre otro un scan (fotografico) di e artefacto di Auschwitz.

Di e manera aki ta toca tambe un tema central di e exposicion: nos antepasadonan ainda ta nifica algo pa nos? Nan ta influencia nos bida ainda? Pero tambe ta un cuestion di cuanto comercialisacion di historia y pasado tin actualmente, mientras e exposicion ta puntra si nos ta realisa con pasado no ta asina leu manera nos ta percibi.
Aristocracia Europeo representa
’Power & Ancestors’ no ta duna un bista limita riba historia. Aunke segun sr. Desimone tin hopi historia di opresion, e exposicion ta duna tambe e banda di medaya di aristocracia Europeo. E banda Europeo tambe tin un aspecto interesante cu den temporada di sociedad agrario e cunukeronan no tabata conoce nan antepasadonan. Si no cu esaki tabata keda di un manera of otro limita na famianan importante cu tabata colga pinturanan di nan antepasadonan.

Casper Prager di Hulanda ta refleha riba su antepasadonan por medio di su obra di ‘chainmail’ cu su conocemento di metalurgia. E artista ta conecta e situacion economico actual cu esun di e tempo cu su antepasadonan tabata bisti di cabayero (knight) cu e situacion actual unda pa biba den un ciudad grandi mester biba cu mesun presion di antes, pero awo hopi biaha cu un posicion di manager, pues persona cu mester bisti bachi.
Expo te 7 di april
Sr. Desimone finalmente ta spera cu specialmente hende hoben bishita e exposicion na Amsterdam, cual lo ta habri te 7 di april. E ta spera cu e exposicion lo trece e mesun claridad cu e mes a haya despues di tende un frase cu ta splica cu tur persona den Caribe tin algo cu ta conecta nan: nan tur a bin di un shipwreck. E conexion cu antepasadonan ta particularmente importante na Aruba unda pa via di hopi mesclamento di diferente descendencia e ta haya cu ta facil pa hende di un manera cuminsa di nobo bou e termino di ‘Rubiano’.