Ken ta Arubiano ? esey ta un pregunta cu hopi di nos ta haci. Awe dia di Himno y Bandera un dia special pa nos tur , pero tambe pa recorda nos custumbernan di nos antepasado. Esteban Peasch , mihor conoci como cheban no ta un persona desconoci. Su mama Clara Croes y su tata Seferino Peasch di paradera , pero a keda cria dor di su madushi Anita Koolman y padushi Vicente Croes.

Despues cu su mayornan a separa e la keda cria dor di su madushi y padushi y su ruman muhenan a bay imelda hof.

Estaban Peasch a lanta na Jamanota den e curason di St Cruz . Na pia di Jamanota su madushi tabatin su cas . Estaban Peasch a bay scol cu su 6 aña for di 8 or di mainta te cu 3 or di atardi , pero na cas su madushi y padushi a siña cheban hopi con pa atende cu cabrito, carne y hasta ta planta cunucu.

E la siña planta y cosecha maishi, patia y bonchi na un cantidad grandi. E tempo ey na Jamanota su madushi tabata e unico persona cu tabatin coriente den Jamanota debi cu tabata uza molina di biento, via di un bateria tabata haya luz. Sinembargo na momento cu no tabatin suficiente biento e luz nan ta flauw, pero tabata uza e lampi di pomp e tempo nan aya.

Estaban Peasch tempo di su tempo nan no tabatin awa via di tubo y tampoco ta primi un boton y tin coriente manera na e momentonan aki cu nos tur ta gosa di dje. Segun Estaban Peasch nan no tabatin frigidare di coriente , pero tabatin frigidare y stoof di keronsin. Asina Estaban Peasch tabata pasa su infancia. E tempo a bula unda cu e partido PPA e tempo ey a cuminsa pasa coriente den Jamanota y despues a bin pone awa tambe.

Cu 6 aña Estaban Peasch a cuinsa bay scol , pero no cu auto , pero na pia tabata cana distancia nan largo bay scol y bin cas bek. Cheban te ainda den su memoria ta corda tempo cu e tabata mucha e tabata sinta pafo cu su madushi y su padushi unda cu nan ta conta hopi historia y tambe leyendanan di Aruba, porehempel nomber di tur e seronan cu tin y su padushi tabata caba cu ne den mondi pa mustra tur e seronan nan nomber y dicon nan ta yama nan asina.

Segun cheban Aruba tin hopi sero y cada un di nan tin nomber y ta nan significacion, cada un di nan tin nan storia nan tas. Cheban ta kere cu lo tabata un bon idea pa e muchanan cu ta lanta awendia sa e nomber di tur e seronan cu Aruba tin pa asina nan sa mas of menos con tabata den e temporada ey, debi cu e tempo ey no ta bini nunca mas y ta un lastima cu dia pa dia e informacion ta bay perdi. Rooytambo, baranca yerbe, piedra di candela, rancho di baca, uliba , sero di cuku nan tur tin un bunita historia.

Tambe reconoce e matanan tabata algo hopi importante. Estaban Peasch tabata consciente di dia di himno y bandera te den aña 1973 , mirando cu prome cu esey tabata hisa e bandera di Hulanda Rood,Wit , Blauw y tabata canta e himno di Hulanda. Estaban Peasch ta conta Bon dia Aruba despues cu Betico Croes a bin libera Aruba , Aruba a bin haya su mes un bandera y status aparte. Estaban Peasch awe un homber di edad ta sumamente contento cu e por a pasa dor di e fase di cambio cu Aruba a pasa dor di dje.

Tambe cheban ta hopi contento y ta gradicido na Betico Croes pa loke e la haci pa Aruba , pero tambe Betico Croes tabata su meneer di scol. Cheban ta bon consciente di e lucha cu a ser hiba cu awe nos por bati na nos pecho cu ta un Arubianonan orguyoso nos ta.

Aruba riba su mes ta un pais hopi gusta pa hopi hende y hasta awendia internacionalmente Aruba ta score halto. Nos como Arubiano mester percura di mantene Aruba y cana e rumbo cu nos kier pa e bay pero den tur aspecto. Estaban Peasch cu su 6 aña di edad tabata lanta madruga y tabata bay chica cabrito den cura y madushi ta herbe, scume pone un poco salo den dje y ta herbe esaki pa por bebe prome cu bay scol.

Banda di esaki bisiñanan tambe ta haya. Antes hopi bisiña tabata comparti cu otro, pero su madushi tabatin un tienda chikito unda cu ta bende su productonan pa henter e bario. Tabatin boonchi , maishi mula , patia y milon cu tabata haya na cantidad. segun cheban e tempo ey tabatin abundancia debi cu tabata yobe hopi unda cu e rooi nan tabata continuamente yen di awa. Awendia cheban ainda ta pasa bishita e cunucu unda cu e la keda cria dor di su madushi y padushi y ta mira un cunucu seco unda cu no tin nada mas riba dje.

Estaban Peasch a haci diferente intento pa e haya e cunucu ey bek pa asina e cuminsa cosecha bek , pero e la keda avisa cu nan a declara e luga green zone y asina e no a logra haya e tereno bek pa asina haci su deseo pa por planta bek manera su madushi y padushi a siña cheban haci diferente plantacion.

Esaki ta un situacion cu te dia di awe e ta lamenta con destrui un zona asina importante cu tabata produci hopi cuminda. Sinembargo Cheban no solamente sa planta pero e ta un bon piscado, su abuela tabata sambuya y tira pisca cu su harpun pa asina nan haya cuminda na mesa, esaki ta tradicionnan di cas cu nunca e no lo lubida, e tempo ey no tabatin ley manera nos tin awe, unda cu tin prohibicion di tira pisca cierto caminda cu ta haci fastioso pa por sobrevivi den e epoca aki manera nan a sobrevivi e tempo aya.

Awendia cheban no ta pisca mas , pero si ta den su cura di cas na Dakota ta planta y ta biba felis hunto cu su casa y nan ta come di nan mes un cosecha. Estaban Peasch ta conseha tur hoben , aunke cu nan a studia un profesion ta importante pa sa bo tradicion pa bo ta prepara pa kico cu por pasa den futuro, manera loke ta pasando actualmente cu e virus a bin ta trece pa nos tur y a pone e mundo bay bek nan nan raiz.