E siman aki nos por a presencia e debate tocante e empleadonan publico cu no ta vacuna, y cu ora nan haya nan den e situacion cu nan mester bay den cuarentena, nan no ta haya pago, a menos cu nan haci uso di nan dianan liber, sea vacacion o ATV. Segun cu nan tin dia liber ainda, nan por tuma nan anto pa e dianan ey ta haya pago. Pa varios politico di oposicion motibo pa comentario cu a hiba e asunto te na Tweede Kamer, unda tabatin pregunta tocante con Aruba (gobierno) ta trata su hendenan, suponiendo cu esaki ta un trato desigual compara cu esnan cu sí a vacuna. Kico ta realmente e caso?

Segun orden di gobierno ta asina cu un persona cu bin den contacto cu un persona cu a test positivo pa Covid-19, mester bay den cuarentena inmediatamente, pa e periodo pa cual e cuarentena ta ordena. E persona cu si ta vacuna completamente, no mester bay den cuarentena y por sigui na trabao. Pues pa e ultimo categoria aki e discusion no ta conta. Tur esaki tabata poni den un memo, di cual gobierno – e ministro encarga cu salud publico – ta bisa cu e memo no ta na vigor mas, cu mientras tanto tin un otro. Di cual e contenido tambe ta desconoci, asina cu atrobe ningun hende sa na kico nan mester atene.

Banda di e discusion tocante e ‘fairness’ of no di e medida, e eventual trato desigual entre persona vacuna o no vacuna, nos lo desea di enfoca riba algun aspecto di con den un aparato publico mester maneha e cosnan aki, na nos parecer. Pa cuminza ta straño cu ta regla e cos aki den un memo na e director y hefenan di departamento, algo anto cu supuestamente no mester yega mas leu. Lo tabata mas apropia pa regla e asunto aki den un areglo mas formal, un decreto nacional o ministerial, unda ta argumenta abiertamente kico ta e motibo pakico gobierno ta haya cu den e caso specifico aki, e ambtenaar no tin derecho riba pago durante su ausencia – pa via di cuarentena – y cu eventualmente e por haya pago sí, cubriendo e dianan di ausencia ey cu su dianan liber cu e tin pendiente ainda. Y si e no tin nan mas, “pech gehad”.

Awor, nos no ta bisa cu gobierno no por tuma ningun medida pa evita cosnan negativo cu nan no kier pa tuma lugar. Den e caso particular aki, kico esey lo ta? E idea ta pa hiba un maneho di estimulo pa ambtenaar percura pa nan ta vacuna? Anto lo mester bisa esey abiertamente den un comunicacion pa e empleado publico y pa henter comunidad. E ultimo aki pasobra pa sector priva tambe ta di importancia con gobierno ta maneha un asunto asina. Den tur sentido, aki tambe, e ehemplo di gobierno ta sumamente importante. Esey ta yama e pregunta: con ta para cu e ausencia di hende den sector priva pa via di cuarentena obligatorio. E empleado por argumenta cu e ta na cas pasobra e ta cumpliendo cu un orden oficial gubernamental. E dunador di trabao den sector priva ta dicidi pa su mes cu e ta paga o no ta paga su empleado ausente, den e ultimo caso aki via un simple constatacion cu ‘bo ta ausente, pues ta aplica “no work, no pay”…? Den e caso di e ambtenaar tampoco tin claridad. Ta existi e stipulacion den e “Landsverordening vakantie en vrijstelling van dienst ambtenaren”, den articulo 26 111 b. cu ta bisa cu un empleado publico tin derecho riba pago completo entre otro :” pa cumpli cu un obligacion legal, un que otro asina leu cu esaki no por tuma lugar den su tempo liber y cambio den schedule di servicio no ta posible”.

Lo por bisa cu e stipuacion legal aki no ta traha pa e tipo di caso aki, pero por a preveni su uso anto treciendo e asunto dilanti den tur transparencia pa e empleado publico y publico en general. Pero no, e defensa ta awor cu e memo ey no ta na vigor mas, pero ainda no ta splica nada y e maneho di gobierno ta keda secreto atrobe? Aparentemente tin mandatario cu no kier comprende ta cuanto y con mundo rond di nan a cambia y cu bo no por sigui mantene secreto den asunto unda abo como gobierno ta e actor principal den comunidad y mester duna un claridad pa unda nos ta bay. Si gobierno kier hiba un maneho di descurasha su trahadornan keda sin vacuna, nan mester bisa esey y actua consecuentemente. E ora nos por discuti esaki, unda tin hende ta apoya gobierno den su intento pa tene su cuerpo di empleado mas sano y presente posible. Cierto di nos lo keda desapunta cu e rumbo cu gobierno tuma, pero esey ta ‘all in the game’. Bo no por spera di ningun gobierno cu semper nan ta comparti bo opinion. Pero e manera di actua den e asunto aki ta robez, pasobra a duna tur espacio pa pensa cu e tabata un intento ‘sneaky’ pa sanciona e empleado publico cu no a vacuna. Keto bay ta parce cu e berdadero significado di e palabra ‘transparencia’ no a penetra den Bestuurskantoor. E lo requeri mas cu cambia e bentananan so.