Eslaine Croes: ‘Bo por ta fuerte y bo por ta femenino na mes momento’

Eslaine Croes ta conoci como un ‘influencer’ riba rednan social pa su videonan di ehercicio y hisa pesas, como tambe pa su mensahenan empoderador pa hende muhe. Den un entrevista exclusivo cu Bon Dia Aruba, Eslaine a conta riba su proceso pa recupera su salud, su forsa, y den esaki, su propio poder.

“Mi a cuminsa cu e intencion berdaderamente cu mi kier a baha peso, pasobra mi kier mustra bon”, el a conta, admitiendo cu e ta zona ‘vain’. “Mi a wak un potret di mi mes, anto mi ta manera, conchale, mi a echt subi hopi peso. Mi no por sigui asina.” Asina el a cuminsa bay gym y haci ehercicio. “Pero durante e proceso mi a siña stima e proceso, siña cu bo ta baha peso, cu bo curpa ta cambia, anto asina bo ta wak e diferencianan den bo curpa. Mi a haya mi pasion.”

Na momento cu el a cuminsa baha peso, e tabata curasha pa e resultado y a descubri cu ehercicio ta algo cu e gusta haci. “Ora bo haya bo pasion e ta bira asina mas facil, pasobra bo ta gust’e, anto e ora ey bo ta cuminsa comparti cu otro hende.”
El a sinti su mes inspira pa comparti su experiencia cu otro hende muhe, ‘pasobra tin un stigma hopi grandi cu hende muhe no por hisa peso hopi’. “Pasobra bo ta bay mustra manera un homber. Anto mi kier a kibra e stigma, mustra cu hende muhe por hisa peso y no mustra manera un homber.”

Alabes, e ta un movemento pa empodera hende muhe. “Bo por ta fuerte y bo por ta femenino, y bunita, y sexy na mes momento.” Riba su pagina di Instagram y Facebook, Eslaine semper ta menciona cu su meta ta pa ta mas fuerte y mas saludabel. Bon Dia Aruba a puntra con e cambio di mentalidad a bin, di kier mustra bon, na kier ta fuerte y poderoso. “El a cuminsa cu mi prome deadlift. Ora mi a hisa mi prome deadlift, dus cu mi a touch e barbell, pa mi, mi a cuminsa gusta.” Cada biaha ta keda aumenta e peso cu ta pone riba dje, impresionando su mes, surpasando su propio limitenan. “Bo ta keda manera ‘wow, wak cuanto peso mi por hisa!’ Bo ta yega na un momento unda e ta bira un pasion saludabel. Mi kier pusha mi mes y mi kier pusha mi curpa pa haci miho.” Su dos pasion ta powerlift y Strong Man ‘cu ta mas acrobatico’ pasobra tin diferente componente.

Alabes, e enfoke riba forsa a haci un cambio riba su mentalidad pa cu nutricion. “Ami tin un historia di bulimia. Ora bo ta come pa baha peso, bo ta echt enfoca riba caloria. Pero ora mi a cuminsa hisa pesas, mi a mira cu mas musculo mi tin, mas mi mester come”, el a conta. “Pues mi relacion cu cuminda, mi relacion cu mi curpa a cuminsa cambia, pasobra mi a cuminsa realisa cu mi por disfruta come cosnan cu hopi hende ta pensa no por ora ta riba dieta of train, y por incorpora esakinan den bo nutricion y toch sigui baha peso.” Pa loke ta dietanan restrictivo, Eslaine ta bisa: “Stop cu e pensamento ey, pasobra hopi hende ta bisa cuminda ta malo, pero e no ta! Bo curpa mester di combustibel, cuminda ta combustibel. Bo kier baha peso, bo mester ta den deficit calorico y esey ta tur.”

Ademas di bulimia, otro problema cu salud di Eslaine tabata relaciona cu su lomba.

“Mi a haya un accident anto esey ta unda mi a cuminsa haya problema cu mi lomba. Mi no tabata sintie te cu un par di aña pasa.” Pero door di hisa pesas, su lomba a bira mas fuerte. “Mi a caba di opera mi lomba. Mi recuperacion – nan ta bisa cu seis siman, cu ta hopi dificil – ami cu cuatro siman caba mi fisioterapista a clear mi pa bay back gym haci ehercicio liviano.” Awo e ta na e punto atrobe unda e por ehercita sin haya dolor. A pesar cu e tin otro cirugia programa, pa retira e resto di un disk cu no a logra saca durante un operacion anterior, e ta na caminda pa continua su journey di hisa pesas y bira saludabel. E ta conseha pa cada persona evalua hunto cu su team medico su opcionnan y kico ta posibel referente fitness y ehercicio. “Tin hopi atleta cu a haci operacion di lomba y ta hisa pesas sin problema.”

Riba rednan social, Eslaine ta papia abiertamente di su reto- y logronan, loke tin biaha ta genera comentarionan negativo. “Mi ta haya hende ta cuestiona si mi tin dos aña ta train, pakico mi no ta flaco. Mi no kier ta flaco. Mi meta den bida no ta pa ta flaco.” P’e, e ta un escogencia entre ta flaco, of duna su curpa combustibel pa haci e training cu e ta stima. “Mi a scoge pa ta fuerte. Pero si un dia mi kier baha peso, ainda mi por haci esey.”
Tambe el a wordo ‘body shamed’ (critica pa su curpa), loke e ta haya lamentabel ‘pasobra bo no ta wak e empoderacion di hende muhe, of wak e trabao duro cu bo ta hinca aden, of con leu bo por yega’. “Nan ta djis wak bo curpa y husga bo djis door di bo curpa, no riba bo personalidad, of bo logro nan. Pa mi e tabata un reto grandi riba rednan social pa cambia e mentalidad di hende.”

Cu e comentarionan aki por nota cu curpa di hende homber ta evalua pa su prestacion mientras esun di hende muhe pa estetica. “Ami ta ‘all about my muscle mass’. Mi sa cu mi tin vet riba mi musculo, mi no ta worry. Mi sa kico mi tin, kico mi curpa por logra. Mi ta cortico y esaki ta duna mi desbentaha den hisa peso. Pero mi ta disfruta surpasa e retonan y mustra tur hende cu ta cool pa ta ‘badass’.”
Segun Eslaine, maske e tambe gusta ta e muhe bunita aregla, den gym e kier ta ‘badass’. Esakinan no ta exclusivo, bo por ta femenino y fuerte alabes.

Pa esnan interesa den cuminsa cu hisa pesas, Eslaine ta recomenda busca un trainer cu ken bo ta comodo. “E no ta un proceso riba bo mes sino hunto cu bo trainer. Mester por tin un bon relacion cu bo trainer, e mester t’ey pa guia bo, duna bo conseho y si bo no tin e relacion ey, e ta bay ta dificil.” Pa esnan cu ta sinti no tin e forsa, e ta bisa: “Nos tur ta cuminsa un caminda, pero si bo no cuminsa, bo nunca no sa na unda bo por yega.” Tambe el a organisa e evento Strong Woman, inspira pa e deporte Strong Man, pa e por laga algo mientras e ta bay opera. “Mi kier pa hende muhe sa cu nan por haci loke nan kier, logra loke nan kier. Nan ta fuerte, nan ta ‘badass’.” E evento ta tuma luga diasabra awo, 31 di juli, 8am-10am. Muhe di tur nivel di fitness por bin participa den e diferente eventonan y asina haya un introduccion cu e sport. Por tuma contacto cu Eslaine via su rednan social, facebook.com/eslainecroes of Instagram @eslainelifts. “Sa cu bo ta mas fuerte di loke bo ta kere.”

Pa finalisa, Eslaine ta bisa: “Confia y disfruta e proceso. Unabes cu bo ta den dje, bo ta bay pensa, ‘dicon mi no a cuminsa prome?’”