Esfuersonan pa atrae personal den enseñansa Y e reto pa haya docente necesario pa para dilanti klas

Scolnan na Aruba ta confronta un reto grandi. Algun scol di DPS, Directie Publieke Scholen mester di docente y simplemente no ta haya. Algun dia pasa DPS a pone anuncio pa solicita personal, pero no ta mustra cu tin un solucion.

For di fuentenan, Bon Dia Aruba a compronde cu e problema a cuminza na momento cu a baha e presupuesto pa cantidad di docente na DPS. Esaki a sosode durante Gabinete Wever Croes y e ex Minister di Enseñansa, dr. Rudy Lampe. E maneho e tempo tabata cu si un docente di DPS, sea a bolbe Hulanda of a bay traha na otro directiva di scol, no tabata reemplaza nan. Varios a laga DPS pa bay traha cu e iniciativanan Montessorie, Educampus y otro. Consecuentemente, e docentenan di DPS cu tabata encarga cu e funccion di e programa Prisma (enseñansa di Hulandes pa alumnonan stranhero) of tabata docentenan pa brinda guia special (begeleidingsleerkracht) mester a tuma e cargo di para dilanti klas. Esey tabatin como resultado cu hopi di e programanan di asistencia a haya problema cu continuacion. Hasta e programa di Interne Begeleider ta confronta reto pa falta di tempo, ya cu e IB’er hopi biaha mes tuma cargo di un klas.

Riba dje, a dicidi pa corta gasto riba reemplazante cu resultado cu e personal na e diferente scolnan di DPS ta traha kizas net cu e cantidad necesario pa tur e klasnan si tur cos ta cana regular, y algun hasta cu di menos. “Esnan encarga cu scol regularmente mester para dilanti klas pa falta di docente. E cuido di alumno ta bou presion y nos ta bek na 25 aña pasa,” ta locual a bisa Bon Dia Aruba.

E preocupacion ta e realidad cu docentenan ta gana mucho mas na Hulanda. E suma netto di un docente ta ricibi como salario na Hulanda ta hasta. Riba dje, hasta un scol manera De Schakel ta mas atractivo pasobra ta paga salarionan ekivalente cu Hulanda.

E falta di docente no ta limita na scol basico. Falta docente y como tal staff pa sostene e trabou. Scolnan a informa DPS di e situacion cu tin basta tempo andando caba. “Nos ta experiencia hopi ‘lesuitval,’” un fuente a bisa Bon Dia Auba. “Nos tin hopi tempo ta raporta e problema aki.”

Enseñansa special

Otro reto ta enseñansa special. Bon Dia Aruba a compronde di por lo menos un scol cu a perde docentenan cu tin e preparacion pa enseñansa special. Nan partido ta basa riba diferente factor cu no ta unicamente salario pero tambe perspectiva pa nan propio yiunan. E aspecto dificil ta cu ta trata aki di un specialidad cu no tin hopi na Aruba y e realidad ta cu na Hulanda tambe tin necesidad pa e specialisacion aki, ademas di condicionnan laboral cu ta mas atractivo.