Esfuerso ta wordo haci pa evita cu Zika ta plama na Aruba

Diamars anochi a tuma luga un conferencia cumbre organisa pa AZV pa e gremio local di dunado di servicio di salud na Renaissance Convention Center. 

E conferencia aki tabata bon asisti caminda tur esunnan presente por haya un bista global, regional y local tocante e tres malesa transmiti pa e mesun sangura di Aedes aegypti: Dengue, Chikunguya y Zika. Sinembargo un enfoke special a wordo duna riba e problematica di Zika. 

Trabou di prevencion   

E miembro di e Team di Maneho di DESPA, Drs. Jerry Staring kende a habri e conferencia aki a elogia e trabou cu departamento di Combatimento di Sangura (GKMB) ta bin realisando  pa preveni e transmision di e malesanan aki. El a informa cu te aworaki a wordo raporta 11 caso di Zika di cual 4 ta local y no importa, locual e ta un cifra aceptabel si nos ta compara nos mes cu e situacion di otro islanan di nos region y paisnan bisiña. 

El a laga sa cu nan kier preveni cu virus di Zika lo wordo plama riba nos isla. P’esey el a pidi tur esunnan presente cu ta traha den sector di salud pa reporta tur caso.

Nan ta poniendo atencion riba e casnan di hendenan grandi, scolnan, etc… caminda GKMB ta realisando un bon trabou di spuit nan. Un punto cu e ta considera importante tin di haber cu e sosten cu nos comunidad ta dunando pa elimina e criaderonan di sangura.  Tambe nan ta trahando conhuntamente cu Serlimar pa contraresta cu Zika lo wordo plama na Aruba.

Situacion mundial

Di su banda, Dr. Jacklyn de Kort kende ta Internista y specialisa riba malesanan contagioso a bin cu basta informacion riba origen, historia y otro aspecto relaciona cu e tres malesa Dengue, Chikunguya y Zika transmiti pa e mesun sangura.

Dr. De Kort a haci referencia riba un caso registra internacionalmente di transmision di Zika dor di relacion sexual locual el a haya interesante pa monitor ya cu e ora eventualmente lo por wordo papia di transmision sexual. El a bisa cu na luna di mei 2015 e prome caso di Zika a wordo descubri na Brasil y na luna di februari 2016 Zika e prome casonan di Zika a wordo registra na Aruba.

Actualmente 28 pais rond mundo a raporta presencia di e virus di Zika caminda ta wordo papia di 120 mil caso total.  El a bisa cu ainda no ta cla si ta existi berdaderamente un link entre e casonan di babynan cu a nace cabes chikito (micro cefalia) y Zika, registra na Brasil. El a haci un yamada pa tur hende tuma e medidanan preventivo pa evita e transmision di e malesanan aki.