Diasabra anochi, escritora,poeta , presentado y un hoben Arubano orguyoso di su idioma materno y di su isla, Rosabelle Illes a lansa su buki nobo ”TITLE” den un tremendo apertura na Fort Zoutman. Bon Dia a sinta papia cu e dama talentoso aki pa asina bay un tiki den su cabes y splica nos tocante e inspiracion tras di su di 3 buki cu entrante awe ta obtenibel na Van Dorp, Plaza, Antraco y Bruna.
Rosabelle:
”Den e buki aki mi a purba algo otro, e tin ‘short stories’ aden, su formato ta hopi chikito compara cu den pasado mi bukinan tabata mas grandi y glossy cu poesia so aden y ilustracion so. E buki ”Title” ta hopi ”rugged” y e ta den un ”pinguin size formato”, e papelnan ta estilo novela cual ta haci cu e ta un buki cu bo por hiba tur caminda sin problema. Mi a skirbi y diseña e buki cu e intencion pa e bira un buki personal pa e lesado” , Illes ta bisa Bon Dia.
Kico ta diferente di e buki aki compara cu e otronan?
Rosabelle:
”E cos cu ta diferente entre e otro ta cu mi a deal basta cu amor den esaki.
Den pasado mi tabata den un relacion stabiel pa hopi largo, anto di baina bo ta bay skirbi tocante
esey pasobra no tin nada pa skirbi, bo sa? Anto recientemente mi a pasa den un break up den un relacion cu a dura 10 aña, e ora ey mi a cuminsa ripara, oh , mi tin basta verso cu ta deal cu esey.
Esaki sigur ta un topico nobo pa mi, pero e resto ta keda basta similar cu e otronan, entre otro topiconan di sociedad y politica”
Bo por elabora un poco mas riba e ‘Short Stories’?
Rosabelle:
”E short stories ta hopi ”stream of consciousness”, mi ta echt bay deep den hende su pensamento anto hopi di e storianan tin 1 personahe y e storia ta bay over di su bida y su experiencia. Mi tin uno por ehempel cu un señora ta bira mentalmente malo pa motibo cu nan ta keda skirbi su nomber fout riba su coffee cup. E storia aki yama ”Stars for sale , A buck each”. Tambe mi tin un otro cual ta manera un ”pre-natal conversation” , cu un personahe cu no kier haya yiu pero e ta sinti e presion di sociedad pa e haya yiu y traha un famia anto e ta pretende cu e la ricibi un yamada telefonico for di su yiu cu no a nace ainda.”
Pa locual ta apoyo, con bo ta haya esaki ta no solamente na banda di instancianan, pero di pueblo mes?
Rosabelle:
”E apoyo ta bayendo hopi bon, constantemente mi a haya mi ta gradici den tur entrevistanan cu mi a haci, mi ta haya cu e hendenan mes a yuda mi crece na unda mi ta awe pasobra awor mi ta ocupa cu hopi mas cos cu mi ta hopi contento di ta formando parti di dje”
Bureau Innovatie Aruba
Actualmente Rosabelle a cuminsa traha na Bureau Innovatie Aruba caminda tin diferente proyecto cu ta tumando luga entre otro ”Green School” , competencia di diseñonan di saco re -usabel. Esaki ta un campaña cu a wordo lansa caminda pueblo di Aruba por participa y siña diseña e saconan. E idea ta pa imagina Aruba den 2045 anto ilustra esey den pintura, potret of palabra anto entrega esaki pa despues kies 4 ganado di diferente categoria basa riba edad. E diseño di 4 ganadonan lo bay riba e saconan cu lo wordo uza supermercado rond di Aruba. Green School su meta ta pa educa generacion nobo riba sostenibilidad y cambiando e actitud ey den nos hobennan pa bira mas activo pa locual ta cuido di nos medio ambiente. Mi kier a gradici Aruba Tourism Authority (ATA), mi tin un lista di sponsors cu a yuda mi y mi kier tambe gradici henter e comunidad pa apoya y mustra nan interes.”, Illes ta bisa.
