Ayera mainta, Minister di Salubridad Publico, Dangui Oduber a anuncia cu ademas di e vacuna di Pfizer, Aruba lo ricibi eventualmente e vacuna di Jhonson & Jhonson for di Hulanda tambe.

Algun tempo atras e mandatario a yega di informa cu e di dos opcion pa Aruba tabata e vacuna Moderna, pero eventualmente e lo bira esun di Jhonson & Jhonson .

Minister Oduber a declara cu esun di Pfizer ta duna un efectividad entre 94% cu 96%. Esey ta e vacuna cu Hulanda ta mandando pa nos. Den todo caso e prome cuater batch cu Aruba ta bay haya ta e vacuna di Pfizer. Pero ainda gobierno di Aruba no a haya confirmacion cual lo bira e vacuna cu nos ta bay haya pa e di 5 batch. “Posiblemente, mi ta bisa posiblemente, pasobra no tin confirmacion di esaki, nos lo por haya esun di Jhnson & Jhnson,” el a declara.

E bentaha di e vacuna Jhnson & Jhnson -segun e mandatario- ta cu e ta mas facil pa conserva. Kiermen bo no tin cu ward’e den un temperatura di menos 80 grado Celsius, gewoon den un frishider bo por warda e vacuna. Otro bentaha ta cu bo mester di un dosis so di e vacuna di Jhnson & Jhnson pa bo haya e proteccion necesario.

 

E mandatario a bisa cu desde cu e campaña di vacunacion a cuminsa, nan no a haya niun notificacion serio di persona cu por haya un efecto colateral. El a probecha pa invita henter nos comunidad pa vacuna

Vacuna Johnson & Johnson

Riba e asunto aki debi cu e mandatario di Salubridad Publico mester a bandona e sala di conferencia pa atende otro compromiso, Bon Dia Aruba a puntra Prome Minister, Evelyn Wever-Croes, cual tabata e motibo su tras cu a haci cu e di dos opcion di vacuna pa Aruba no ta eventualmente mas Moderna, sino e vacuna di Jhnson & Johnson. Ta conoci -a base di informacion di mundo cientifico- cu e vacuna di Jhnson & Jhnson tin un 66% di efectividad. Mientras cu Pfizer y Moderna tin un eficacia di 95% pa preveni e malesa di Covid-19.

E prome mandatario a bisa cu e no sa si tin un motibo specifico cu Hulanda a cambia di opinion. Loke e mandatario sa cu den e prome instante cu Hulanda a duna Aruba diferente opcion di vacuna cu nos ta bay tin, e situacion aki a cambia despues.

El a splica cu cierto momento no tabatin suficiente vacuna cu tabata wordo entrega. Pais Hulanda a cay atras den vacunacion pasobra nan no tabata hayando e vacuna. Apesar cu ya caba nan a yega di haci nan respectivo pedido cerca e compania di vacuna, pero nan a cay atras mundialmente. El a bisa cu Hulanda sigur a cay atras y consecuentemente Aruba tambe.

Ainda e problema di suministro masivo di vacuna pa mundo henter no ta soluciona, y debi na esaki Hulanda a bin cu cambionan. E no ta descarta cu e lo por bolbe cambia.

Premier Wever-Croes a aclaria cu nos no a cay atras ainda den cantidad, ya cu nos a cuminsa ricibi e vacuna manera a wordo plania. E prome batch di vacuna Pfizer a bin tres siman pasa. Diaranson a yega e di dos batch di e mesun tipo di vacuna, esta Pfizer. Pa fin di luna lo bin e di tres batch. E ta rond di 24 mil vacuna di Pfizer tambe, y logicamente su di dos dosis tambe ta e mesun vacuna aki.

Loke Aruba ta papiando cu Hulanda ta riba e vacuna cu lo bin despues di april. E prome mandatario tabata reserva pa sigura cu e lo bira e vacuna di Jhnson & Jhnson. E lo prefera di warda pa wak cual lo ta e vacuna cu Hulanda lo manda pa nos na luna di april, ya cu e mes como hefe di estado tambe tabatin cierto preguntanan.

Encuanto si gobierno di Aruba a wordo informa riba un escasez di materia prima pa produci e vacuna cu eventualmente lo afecta e suministro mundial, el a bisa cu ainda Aruba como pais no a haya e advertencia aki ainda.

Nan a haya informacion cu Aruba lo por haya e lote di vacuna aki prome hasta, ya cu den Reino nos pais ta bayendo bon cu e registracion. Actualmente tin un total di mas cu 20 mil persona registra. Segun e mandatario aworaki nos tin mas hende registra cu pa full e luna aki nan por sigui cu nan campaña di vacunacion.

Informacion cu DVG a yega di divulga a indica cu -segun planificacion- Aruba lo ta ricibiendo e di 3 batch den e siman di 22 di maart. E cantidad di vacuna aki un bes mas lo fungi como prome dosis pa un cantidad di persona adicional cu tambe ta encera e grupo cualifica como vulnerabel via e dokter di cas.