Cifra di desempleo general a baha te na 4,3%, segun e ministro encarga cu entre otro Labor. Esaki a keda presenta como un hazaña nunca visto den ultimo binti aña. Suponiendo cu e forma cu a yega na e cifra aki ta corecto, esaki anto ta refleha un situacion indicativo cu economia ta creciendo rapidamente, cu e consecuencia cu desempleo a baha considerablemente tambe. Sin embargo, esaki ta motibo pa hubilo? Reduccion di desempleo ta algo bon, pero e ta trece su retonan cune. Kico ta e caso?
Pa cuminza, un cifra di 4,3% ta hopi cerca caba di e cifra cu expertonan ta yama ‘frictional unemployment’. Kico esaki ta? Esey ta e parti di e desempleo cu ta considera e parti ‘natural’, e parti minimo semper lo t’ey. Hende cu ta cambiando di trabao pero no ta kita di un lugar y drenta otro servicio inmediatamente. Hende cu a caba di studia y cu ta buscando un empleo na nan nivel; nan ta desemplea pero no ta disponible pa cualkier trabao. En todo caso, esaki ta haci cu algun porciento di desempleo por ser considera ‘frictional’. Antes esey tabata considera 5% porciento pero cu tempo y a base di experiencia den varios pais, por bisa awor cu 2 pa 3% ta considera e categoria aki.
Kico esey ta significa den practica? Cu den cierto sector o den cierto profesion mester por tin un situacion di escasez caba. Esey ta e caso na Aruba? Sigur cu si, entre otro den sector turistico y den construccion, pero tin mas. Lo ta bon si banda di un mero cifra general e departamento concerni cuminza produci dato mas specifico, unda tin escasez y ki tipo di empleo ta buscando. Un departamento gubernamental no t’ey solamente pa procesa permiso sino tambe pa duna informacion mas amplio na comunidad y na nos economia. Datonan di desempleo specifica ta di sumo importancia pa planificacion economico, sin embargo te awe no ta tuma esaki na cuenta y no ta publica esakinan.
Un pregunta hopi importante pa contesta ta di unda e caida repentino aki di desempleo ta bin. Un promer pensamento ta cu esaki ta debi na e recuperacion economico, loke sin duda algun ta hunga un papel, pero esey no ta splica tur cos. Loke mester tuma na cuenta ta cu desde 2019 te awe nos poblacion (oficial) a cay cu alrededor di 2.000 persona, di algo mas di 109.000 na 2019 te algo mas di 107.000 na 2022. Esaki ta haci cu e grupo di e poblacion cu ta considera e parti economicamente activo, hende emplea y desemplea, hunto considera e categoria ‘beroepsbevolking’, ta mustra un caida mas grandi ainda, di alrededor di 58.500 na 2019 te 53.800 na 2022. E ultimo aki ta cifra di e propio departamento di Labor. Banda di esaki nos por observa e cifranan di SVb cu ta mustra un aumento grandi durante 2022 y e promer 9 luna di 2023 di e cantidad di cupo di trabao, y empleado, registra den e periodo aki. Esaki ta un proceso anto cu tin dos banda: e banda di trahador disponible, cu a keda reduci, y e banda di oferta di empleo, cu a aumenta drasticamente tambe.
Kico ta haci cu escasez y amnistia?
Loke e mandatario no a atende ‘at all’, ta e pregunta clave: kico pa haci? Sigur pasobra e contesta logico ta pa importa mas trahador di exterior. E situacion aki ta sclama pa accion rapido, y esey no por ta simplemente un cuestion di cuminza procesa cu mayor rapidez tur peticion di e empresanan, sin tuma na cuenta e presencia di diezmiles di persona indocumenta cu a haci nan bida aki caba. Realmente nos no por comprende nos politiconan, tanto di banda di gobierno y di oposicion cu aparentemente no ta presta atencion na e asunto aki, cu por ta hiba nos den un situacion cu lo ta bay tin un ‘de facto’ amnistia, conduci pa e empleadonan publico, sin cu tin regla y norma acorda y aproba politicamente. A caso nan ta prefera en berdad un amnistia ‘silencioso’ cu e mandatario encarga cu tanto Labor como Integracion por bay haci? Nos ta mira ultimamente varios señal cu ta bin di e mandatario aki, cu ta indica cu e presion di escasez ta bay haci cu mester trahador cu Aruba no tin, y hasta el a indica caba e situacion di e miles di stranheronan aki, pero nos no ta mira un preparacion di un politica explicito di su banda, cu ta splica bon cla den ki direccion nos ta bay, y cual lo ta e reglanan pa e operacion aki. Ta imposible pa laga e evaluacion di miles di caso di persona indocumenta den man di hende cu no tin instruccion estricto pa evaluacion di e casonan. Esaki simplemente lo causa mas iregularidad den e proceso di admision cu nos tin caba, mientras nos no tin ningun seguridad cu a atende e problemanan cronico ey di un manera efectivo.
Ademas, manera nos a indica caba den un anterior Editorial, e eventual ‘amnistia silencioso’ lo bay tin consecuencia pa e maneho Hulandes encuanto ciudadania, pasobra sin duda algun un entrada repentino di miles di persona, cu den varios caso tin hopi aña aki caba, ta bay causa un aumento grandi di peticion pa naturalizacion aki tanto aña. Si nan no tin problema cu esey, tambe ta bon, pero promer cu tur cos aki mes e debate tocante amnistia no por keda posterga mas.
