Escasez di empleado den cuido di mucha ta poniendo siguridad den riesgo

(NLTimes) – Escasez di empleado den cuido di mucha ta birando asina grandi cu hopi no por garantisa e principio di “4 wowo” na tur momento, Gjalt Jellesma di asociacion di interes di mayornan den cuido di mucha Boink a comenta na AD.

E principio aki yama “4 wowo” a keda introduci despues di un caso di abuso sexual grandi den aña 2013, cual ta bisa cu mester tin 2 adulto den un klas pa cuida di e muchanan na tur momento.

“Nos ta ricibi reportahe cu cosnan ta bayendo malo y como resultado di esaki e siguridad di e muchanan ta den riesgo,” Jellesma a declara. “Nos ta ricibiendo cada biaha mas señal di comportamento transgresivo. No pensa inmediatamente riba abuso sexual di mucha, pero por ehempel, empleadonan impaciente cu ta gara muchanan duro na nan man. E desaroyo di e moda aki ta logico; bo no por kita tur tipo di regla di calidad cu impunidad.”

Emmeline Bijlsma, director di Childcare Branch Organization a yama esaki “sumamente preocupante”. E muchanan su siguridad ta bao rpesion pa causa di escasez di empleadonan. “Nos ta spera cu mayoria proveedor lo scoge pa mantene su mes den cumplimento cu e reglanan basico y pa motibo aki, cera e gruponan unda cu e principio di ‘4 wowo’ no por keda aplica, aunke esaki ta zona teribel. Nos no mester cay bao e limite.”

E principio aki, conhuntamente cu otro medidanan manera vigilancia via camara y espacionan adapta, tin e meta di haci hopi mas dificil pa un persona keda su so cu un mucha. Sinembargo tur cos ta den man di y ta depende riba suficiente empleado, Bijlsma a declara. “Si esaki no ta disponibel y proveedornan mester cancela contract cu mayornan, e muchanan lo ser laga cu un babysitter na cas. Eora nan no lo tin supervision mes ni tampoco un garantia na nan siguridad.

Childcare Branc Organization a urgi gabinete pa no sigui adelante cu su plan di haci cuido di mucha casi gratuito cuminsando for di aña 2025 pa motibo cu e sector no por lidia cu e gran fluho di muchanan. “Desafortunadamente, mi no tin un solucion pa e situacion actual,” Bijlsma a expresa. “Mi ta bisa na politiconan; tende nos empleadonan su peticion pa ayudo. Nan no ta mira un lus mas na e fin di e tunnel.”