(Mercopress) – Scarsedad di combustibel pa avion a pone cu companianan di aviacion cu ta opera na Colombia a reprograma nan servicionan. E problema lo a ser causa pa un fayo electrico na e refineria di Cartagena dia 16 di augustus.

Avianca mester a cancela 26 servicio na Valledupar for di 26 di augustus pa 2 di september y lo bula solamente e siman aki entre Bogota y Cartagena riba diahuebs y diabierna cu un solo servicio diario. Ademas e benta di pasashinan pa biahe entre Bogota y San Andres a keda cancela pa un siman, entre otro iregularidadnan.

“Ta sugeri pa controla cu bo operadonan aereo tocante e status di bo vuelonan,” un borchi na e aeropuerto di Medellín a bisa. “Algun vuelo lo ta temporalmente cera pa benta” debi na e scarsedad di combustibel pa avion den e pais.

Avianca a anuncia den un comunicado. “Awor nos prioridad ta pa proteha biaheronan, nan plannan di vuelo y conserva efectividad. Ta p’esey nos a busca mecaniconan pa minimalisa e impacto di e situacion aki riba e operacion. E situacion aki ta mustra e necesidad pa actornan di e cadena di suministro anticipa y coordina miho pa tin claridad tocante inventario y disponibilidad di combustibel,” e compania a agrega.

Otro companianan manera Easyfly ta mantene nan orarionan usual, aunke prijs di pasashi a subi cu 50%.

Presidente Gustavo Petro a insisti cu no tin scarsedad di combustibel pa avion. ”Loke ta existi ta un actividad iregular cu ya ta bou di investigacion,” el a argumenta.

“Te ayera nos no tabatin informe di operacionnan cancela pa ningun motibo asocia cu combustibel,” asina e minister di Transporte, María Constanza García a bisa, mientras e tabata admiti cu algun compania di aviacion no tabata bende pasashi pa algun destinacion como precaucion. Segun e funcionario, e inventario di combustibel na aeropuertonan ta ser vigila di cerca pa minimalisa daño. Tambe el a señala cu operacionnan for di El Dorado (Bogotá) ta garantisa pa e proximo 5 dianan.

E crisis di combustibel a bira publico ora LATAM Airlines Colombia a informa cu no tabatin mas combustibel na Leticia, Monteria y Bucaramanga, mientras cu e nivelnan na Bogota tabata yegando na nivel peligroso.

E fayo electrico na e refineria di Cartagena dia 16 di augustus tabata ser spera pa causa un deficit di 5% den e entrega di combustibel di aviacion di e pais. Sin embargo, Ecopetrol estatal a declara cu e operacionnan na e refineria di Cartagena no a ser afecta, a pesar di cual Ecopetrol a importa 100.000 bari adicional di aeronafta cu lo mester a yega e pais fin di e siman aki.

Mientras tanto, LATAM ta recarga combustibel pafo di Colombia riba su vuelonan internacional y a ahusta su operacion di acuerdo cu esaki, pues 36 di e servicionan programa pa diamars awor a ser cancela.

E aerolinea lo sigui vigila disponibilidad di combustibel y haci e ahustacion necesario, CEO di LATAM Santiago Álvarez a splica. Pasaheronan afecta pa cancelacionnan lo por reprograma nan vuelo, haci cambionan den di un periodo maximo di un aña of pidi un restitucion.