(NLTimes) – Companianan di awa na Hulanda a bisa cu un combinacion di polucion, secura y e crecemento di e poblacion ta un menasa na e cadena di suministro na awa limpi y potabel den e pais, nan a bisa den un carta. Escasez di awa potabel por ta solamente algun aña leu, e companianan a bisa segun NRC.
“E sistema di awa ta yegando su limite pa causa di secura, salinidad y e crecemento den e demanda di awa pa causa di e poblacion y economia cu ta keda crece. E disponibilidad di awa pa e cadena aki ta bao presion,” e carta a declara. “Ademas, e calidad di awa potabel su fuentenan ta den deterioro pa causa di polucion y agricultura, viviendanan y e industria. Generacionnan futuro posiblemente ta den riesgo di keda cu un suministro menos sigur di awa potabel.”
Secura a bira mas frecuente, e economia ta sigui crece y e necesidad di awa tambe a crece rapidamente durante e ultimo 10 aña, nan a bisa. E demanda pa awa lo sigui crece, particularmente pa motibo cu e poblacion lo crece cu mas o menos 1.5 miyon persona dentro di e proximo 20 aña. 3 di e companianan ta bao presion inmediato pa cumpli cu e mandato pa provee awa limpi y potabel. E companianan aki ta Dunea, Vitens y Waterbedrijf Groningen segun NRC. E corant a examina documentonan interno di Verwin, e asociacion di companianan di awa, pa yega na su conclusion.
Tur 10 di e companianan di Hulanda posiblemente no lo por cumpli cu nan obligacionnan pa cu e provision di awa pa aña 2030 si e infrastructura actual no ser mehora. Esaki ta nifica, colecta mas awa, aumenta e capacidad di purificacion y inversion den mas sistema di distribucion. “Tin hende no ta balora awa potabel, y ta kere cu esaki ta djis sali for di cranchi. No ta berdad cu e ta djis sali. Esaki ta preocupante,” Peter van der Velden, president di Verwin a declara den un entrevista cu NRC.
E companianan di awa tambe tin miedo cu nan no lo por provee awa na tur 900,000 di e casnan nobo cu gabinete kier construi den e proximo 7 aña. Pa causa di esaki, nan ta kere cu e acceso na awa y tera mester keda e prioridad ora cu considera e plan espacial di Hulanda.
E companianan a propone varios solucion na e problema, manera kita e tape cora rond di e permiso pa extraccion di awa, apresura e desaroyo di sitionan nobo di extraccion y converti awa di lama den awa potbel. E gobierno su limitacion pa laga e companianan di utilidad pa ganashi tambe tabatin e efecto pa limita nan habilidad di inverti den e cadena di suministro y innovacionnan nobo, nan a declara.
Ademas, nan a recomenda pa haci mas facil y te hasta obligatorio pa hogarnan colecta nan mesun awa di yobida y recicla nan awa potabel malgasta. Campañanan di conservacion di awa tambe por disminui e uso di awa den e hogarnan.
