Harry y su esposa a cambia London pa Hollywood. E ayo di e pareha Sussex a laga un costo financiero na pueblo Britanico. Norman Baker, ex-minister di gobierno Britanico, a haci un estudio detaya di e gastonan genera pa e duke di Sussex e tempo ey, y a duna di conoce e cifranan astronomico, cu no ta laga e pareha bon para.

“For di dia di nan boda te dia 31 di maart ultimo, mi ta calcula cu e contribuyente Britanico a desembolsa mas di 44 miyon libra ($53 miyon) pa duna Harry y Meghan, ta parce, locual nan tabata kier”, Baker a comenta na e medio, sigurando cu e cifra por incluso ta mayor, maske imposibel di calcula debi na e scuridad tocante e cuentanan di Cas Real.

Entre e gastonan analisa pa Baker, ta tene cuenta cu pago di empleado, costo di retiro di nan despues di Megxit, nan hopi cuestiona vuelonan priva durante nan vakantie di berano, siguridad of organisacion di nan boda, cu ta calcula por a costa cerca di 33 miyon y mey di libra ($40 miyon dollar).

E pareha a cuminsa nan bida matrimonial na Nottingham Cottage, un caso victoriano den teritorio di palacio di Kensington. Nan a muda den apartamento 1, despues cu a restaura esaki. Segun informe, e trabounan na e luga, cu a dura un aña, a costa contribuyentenan 1.4 miyon libra. Sinembargo, e pareha a dicidi cu no tabata kier muda. E supuesto motibo? E mal relacion di e pareha Sussex cu nan bisiña: prins William y su esposa Catherine.

Na januari ora a duna di conoce nan renuncia di famia real, e dukenan a compromete pa debolbe hasta e ultimo libra na pueblo Britanico. E pareha lo tin mester di añanan pa debolbe e casi $3 miyon cu remodelacion di Frogmore Cottage a costa, e residencia situa riba tereno di Castillo Windsor. Un cas cu Elizabeth II a fia nan y den cual apenas nan a biba algun luna.

Segun Daily Mail, e pareha a ofrece 18mil libra pa luna, cu tambe ta destina pa cubri huur di e luga. Si ta asina, mester pasa hopi aña te cu e pareha Sussex por paga nan debe. Sinembargo, nan tin un fortuna balora na varios miyon. E pareha lo por paga henter e suma mesora, si nan tabata kier.

Pero mientras tanto, nan ta disfrutando un estilo di bida costoso.

Poco despues di nan retiro di realeza, Markle y Archie y a bay biba den un mansion di $10 miyon na isla di Vancouver, Canada y despues a muda na un residencia di $18 miyon na un comunidad cera di Beverly Hills, Los Angeles, propiedad di Tyler Perry, ken Meghan supuestamente a conoce a traves di su amiga Oprah Winfrey.