SGG Management, bufete di abogado Croes Wever Tchong, Alejandro Lovera, IMC International & Trust Company y e oficina di trus AMTR di Stanley Looman ta wordo menciona como intermediario den Panama Papers.
Aki por haya e lista di e 27 compania cu a haci uzo di e intermediarionan y representantenan Arubano. Ora bo ta click riba ‘officers’ bo ta haya e 29 nomber di personanan local sea compania cu a actua como representante. Banda di esaki por haya e 18 adres Arubano, cu ta menciona den e database cu ICIJ a publica awe.
Mayoria di e companianan aki (19) ta registra na British Virgin Islands cual riba su mes ta un ‘tax heaven’. 4 compania ta registra na Britisch Anguilla y e resto 4 na Panama.
Manera anuncia e organisacion internacional di periodistanan investigativo, esta International Consortium of Investigative Journalists (ICIJ), a publica awe tur info di e mas cu 200.000 compania di offshore bou investigacion den e caso ‘Panama Papers’. Por busca den e database aki riba compania y e personanan su tras y mira con e relacion ta.
E informacion ta bin di e compania Panameño, Mossack Fonseca, cu ta un di e oficinan mas grandi den mundo cu ta regla e parti financiero y administrativo pa companianan, fundacionnan, trust y otro fondo cu entre otro kier probecha di areglonan mas atractivo pa cu impuesto den 21 paisnan conoci como ‘tax heavens’. E database ta contene informacion relaciona cu mas cu 200 pais, entre otro Aruba, Corsou y Hulanda.
Pa mas info, bay riba e website di ICIJ
Consecuencia
E consecuencianan pe companianan y personanan local no ta conoci ainda. Mester menciona cu hopi di e companianan den e Panama Papers a haci uzo di construccionan legal pa asina evadi di paga (of paga menos) belasting nan nan pais. Pues no por conclui automaticamente cu nan a opera ilegal of sconde cierto actividad comercial cu ta contra ley.
Esaki na prome instante ta keda den man di Departamento di Impuesto na Aruba pa investiga. Asina Ministerio Publico tambe a contesta riba preguntanan di Bon Dia na comienso di april. Den e caso cu durante e investigacion algo a sali cu tin consecuencianan penal, e ora OM lo wak kico lo haci.
