Mescos cu Parke Nacional Arikok, Aruba Ocean Villas mester percura pa balans

Cualkier actividad humano, incluso den Parke Nacional Arikok, ta haci daño na naturalesa. Pero e evaluacion mester ta con ta balansa e daño cu regeneracion. Asina Errol Sjak Sjie di DIP a bisa na fin di e tratamento di e caso sumario cu Fundacion Parke Nacional Aruba y Fundacion Commandeursbaai a lanta contra Aruba Ocean Villas, AOV.

Sjak Sjie a bisa cu DIP a haya y a analisa tur documento di AOV y pa e motibo ey a duna e permisonan pa e proyecto por continua.“Y a aproba tur e documentonan despues di analisis. Nan tabata na nivel di aprobacion y calidad,” Sjak Sjie a bisa.

E proyecto no di awor, el a inicia na 2009, y den e ROP 2019 (Plan Ordenanza Teritorial) ta papia di aprobacion di tres proyecto di bungalow riba awa na Savaneta. E ta conforme e Plan di ROP. Y e maneho di Gobierno den e ROP, esta e ROPV cu ta casi cla, ta menciona e proyecto di Aruba Ocean Villas. Ta un proceso cu a dura ocho aña.”

Riba e pregunta con DIP por duna diferente compania e permiso, e contesta di Sjak Sjie tabata cu semper a maneha cu e mesun inversionista, cu ta Sra. Osyth Henriquez. Pa DIP, e ta importante pa sa ken ta e persona cu ta tras di e proyecto. Companianan tur por cambia di nomber pa diferente motibo.

Interes di naturalesa

DIP ta tene cuenta cu interes di tur partido, e ehecutivo di DIP a sigui bisa. Ta evalua e preocupacion di tur den e Ordenanza Teritorial, incluso interes di naturalesa. Y e proyecto aki ta banda di un area di naturalesa cu ta protegi. Ta p’esey mes a exigi di AOV cu nan mester entrega un reportahe di efecto medio ambiental, MER, bon documenta, y ademas, “nos por instrui nan pa si pa parti di naturalesa tin exigencia adicional. Mas ainda, nan mester pasa e proceso di e aanlegvergunning cu ta duna solamente den cuadro di proteccion di naturalesa.”

Pues, no ta cuestion cu e proyecto di AOV no lo causa daño, sino cu mester evalua si e impacto riba naturalesa ta di tal indole cu ta permiti regeneracion of no. DIP a considera cu e impacto di e construccion y operacion di Aruba Ocean Villas ta uno cu ta cumpli cu e rekisito di balans. “Si e impacto tabata mucho halto, lo no a permiti’e.”

Unda tin hende tin impacto

Den concepto di Sjak Sjie, tur caminda unda tin actividad economico mester por spera un impacto riba naturalesa. E meta ta pa mitiga esaki. “Por compar’e cu Parke Nacional Arikok mes, cu ta parti di naturalesa. Pero Parke mes no ta exclui un combinacion di actividad pa haci esaki duradero y balansa. Te ainda ta acepta cu vehiculonan 4×4 ta drenta parke, aunke cu a limita e cantidad, pasobra mester trece un balans. Cu tin daño? Si. Tur actividad humano ta trece daño na naturalesa. Pero mester contene e daño pa e no ta di mas. Y ta e daño di mas mester evita pa asina sigura cu naturalesa por regenera.” Ehempel ta con hopi area natural a recupera despues cu e refineria a stop di opera. Y e ley di Naturalesa mes ta indica cu por duna un permiso pa actividad cu por afecta naturalesa, pero mester tuma cuenta pa evita cu e daño ta irreversibel.

Gobierno ta stipula cua ta areanan natural cu mester di proteccion. Y asina a determina otro 16 area cu a bay bou maneho di Fundacion Parke Nacional Aruba, cu ta inclui Bubali Plas y awa di Lagoen. Sinembargo, e saliña cu awor ta den discusion cu a bay pa Aruba Ocean Villas, no ta cay den e areanan protegi. “Tres aña pasa, ora cu tabata discuti e areanan adicional cu mester di proteccion, esta e 16 terenonan cu entretanto a pasa bou maneho di Fundacion Parke Nacional Aruba, no a menciona mes e saliña na Commandeursbaai.” Errol Sjak Sjie kende a enfatisa cu e tereno di AOV ta keda na rand di un area protegi, cu ta mangel, pero cu no ta cay bou FPNA. “Si tin daño na e mangel mes, e mester keda na nivel aceptabel, mescos cu parke ta permiti hende ta cana, mountainbiking y otro trafico.”

Marinierskazerne

Tabatin dos otro opcion pa mesun tipo di hotel riba awa den Commandeursbaai, pero nan no por a continua pa motibo cu Marinierskazerne a protesta. Segun Errol Sjak Sjie, Marinierskazerne no tabatin problema cu e tipo di hotel sino e grandura di e tereno cu e dos proyectonan cu entretanto lo no continua, lo a haya. “Den cuadro di seguridad, Marinierskazerne tabata kier pa tene distancia. “Nan no a evalua e proyectonan a base di nan merito sino e aspecto di seguridad y distancia for di e facilidadnan di Marinierskazerne y Wardacosta.”