Ayera merdia, residentenan di Oranjestad a haya nan mes confronta cu un storing di coriente, cu a dura den algun bario varios ora. Elmar NV a traves di su cuenta di Facebook a informa cu e suceso a tuma lugar pa motibo di eror di un contratista.

Segun Elmar, ayera merdia rond di 1.30pm, durante trabaonan tumando lugar na e Onderstation di Elmar na Sabana Blanco, “un contratista cu ta realocando diferente kabelnan a dal e kabel cu ta transmiti coriente na un gran parti di Oranjestad, causando un interupcion di servicio di coriente. E siguiente areanan ta afecta: Centro di Playa, Belgiestraat, Madiki, Arendsstraat, Driemasterstraat, Postkantoor y vecindario.”

Pa 2pm, Elmar a informa cu su tecniconan tabata na e sitio y tabata “trahando duro pa soluciona e problema,” y tiki despues a informa cu a reestablece suministro di coriente den e area di Schelpstraat, Bestuurskantoor, Renaissance Wind Creek y vecindario. A cuminsa suministra coriente den un parti di e area afecta y lo continua asina te na momento cu tur cliente tin coriente back.” Sinembargo, a indica cu no tabata conoci con largo e trabao pa reestablece e suministro di coriente lo dura, pero si a informa cu tabata “isolando e problema y lo shift load pa reestablece e suministro di coriente den areanan afecta.”

Pa 2:45pm, Elmar a informa cu nan mes a interumpi e servicio di coriente temporalmente na Punta Brabo “pa transferi e carga por medio di un otro stacion.” Despues di esaki, poco poco a cuminsa reestablece e coriente, cuminsa na Eagle, vecindario di Office Systems, vecindario di Dimas, area di Solito, entre otro.

Finalmente pa casi 5pm a informa cu a reestablece coriente na “un parti di Klip,” pero asina mes ainda tabata trahando duro pa reestablece suministro di coriente na Beatrixstraat, Wilhelminastraat, Compleho Deportivo Guillermo P. Trinidad y vecindario. Pues en total e storing a dura mas cu cuatro ora.

Riba rednan social por a mira usuarionan informando cu e storing a afecta Caya Grandi, unda negoshinan a haya inconveniencia pa motibo di esaki. Ademas, mirando cu Aruba ta experimentando temperaturanan halto den e epoca di mas calor, hopi usuario a expresa nan malcontento pa e situacion fastioso cu nan a confronta.

Igualmente, noticiero online 24ora a reporta cu minister di Transporte, Integridad, Naturalesa y Asunto di Adultonan Mayor, Ursell Arends a haya su mes confronta cu problema pa drenta Cocolishi pa motibo cu no por a hisa e hefboom pa laga su auto pasa.