Bao un solo basta fuerte, despues di 10or na Centro di Bario Playa Pabou, lider di partido Curpa Eric Ras a eherce su derecho pa vota den eleccionnan cu a tuma luga ayera dia 25 di juni.
Na stemlokaal number 19, Ras a yega hunto cu su sernan keri y a expresa pa medionan di comunicacion presente cu ayera tabata un dia hopi importante pa e isla na unda ta bay tuma e determinacion unda lo kier yega den e proximo cuatro aña.
“Nos di partido Curpa a prepara pa e ocasion aki y nos ta kere cu pueblo lo bay vota diferente y nos lo mira cambio riba e luga aki”, el a sigura.
Asina mes, Ras a bisa cu mester start e economia mas lihe cu lo ta posibel “pasobra nos tin debenan pa paga y tambe crea cuponan di trabou”.
Mirando cu e temporada di campaña tabata hopi cortico, Ras a declara cu importante ta cu e hende mes a acerca su persona pa motibo cu nan kier mira un cambio manera el a sigura y esaki ta e momento pa e cambio.
El a informa cu nan a bishita algun casnan pero door di pandemia di Covid-19 nan a mantene nan mes riba e protocol.
Tocante e perspectiva cu Ras tabata espera pa e dia di ayera, el a bisa cu ta importante cu pueblo ta dicidi y no nan, “nos ta presenta nos programa pero pueblo ta esun cu ta dicidi y ta vota pa e cambio”, el a finalisa.
