Nos por a mira nos minister president bay parlamento y bisa cu gobierno ta negocia cu compania cu lo bay habri nos refineria y cu nan lo inverti 3.5 biyon y cu lo crea 2 mil cupo di trabao. Ora cu a bay haci un sondeo a bin saca afo cu e website ta uno amateur y e dominio a caduca dia 15 di November 2020. E risk index di e website ta 45% y ta bisa mediocre pero e ta un website cu no ta sigur. Su domina registracion ta di 15 di november 2020 anto cu un location cu no ta cuadra pasobra e ta ariba awa banda di Wichita na Kansas.
Ami no ta compronde con un hende por hinca den cabes pa bin papia un disparate asina. Despues cu el a sali scondi bay Hulanda firma pa pone 2 rijkswety entrega nos Status Aparte. 13 di november2020mesterkedagraba den mente di nos pueblo paso nos prome minister a haci nos pueblo COHO y INUTIL. Ta bay parlamento pa trece un promesa falso y ta kere cu e por hunga cu sentimento di pueblo. Nos tur sa cu nos parlamentarionan tambe no tin derecho di keda sinta ey den pa via scondi scondi a duna prome minister green light pa bay firma y den comision central ta vota pa retira minister Lopez Tromp.
Aki na Aruba nos gobernantenan a perde tur cuero di cara. For di dia cu a wordo bisa cu mas cu un minister ta bao di investigacion pa corupcion nos prome minister mester a bay gobernador y entrega su gobierno pa asina no stroba e investigacion. Nos mester tin principio y si nos kier papia di integridad pio ainda.
Cada dia cu pasa e gobierno aki ta cobando su mesun graf paso tur cos cu nan bisa ningun hende ta kere nan mas. Awor si mi ta kere cu awa a pasa hariña y mester bisa ta basta. Mi tin sigur cu ainda tin hopi Arubiano cu ta para pa principio y ta kere cu nos Arubiano no ta hende nan inutil ni coho. Ainda nos por bati riba nos pecho cu nos Arubianonan ta hendenan capaz.
