Eric Dormoi: “Nos ta wak cu Caribe ta un bon oportunidad pa productonan Panameño”

Eric Dormoi, director nacional di promocion di exportacion di Ministerio di Comercio y Industria di Republica di Panama, a bin Aruba siman pasa hunto cu su ekipo y algun comerciante Panameño pa asina promove exportacion di productonan di su pais pa Aruba.

Den e productonan cu nan a trece tin productonan di lama, agropecuario, industrialnan, agroindustrial. “Nos semper ta den e buskeda di oportunidadnan y nos ta wak cu Caribe ta un bon oportunidad pa e productonan Panameño”, Dormoi a señala.

El a trece dilanti cu nan ta hopi competitivo cu nan productonan di construccion y tambe den e area di alimento. Pa motibo di e crisis sanitario di pandemia di Covid-19 y tambe di e guera na Ucrania unda mayoria di e paisnan a sufri di scarsedad, “nos tin cu fortalece nos mes den region pa minimalisa e impacto negativo ey, pasobra paisnan grandi manera esunnan Asiatico nan ta protege nan mes, y p’esey nos tin cu promove nos mes den e region cu lasonan di amistad y tambe comercial pa yuda nos den turismo, exportacion of intercambio den Free Zone”, el a bisa ”.

Nan a scoge Aruba pa motibo cu nan ta consider’e como un mercado natural pa Panama y tambe pa su turismo, unda Aruba su mercado principal ta Merca y Panama segun Dormoi a expresa, tin productonan cu por ofrece como un otro opcion di suministro.

Siman pasa a tuma luga e evento “Trade Mission Panama to Aruba” na Renaissance Convention Center. Como parti di un plan di accion di Gobierno di Republica di Panama, nan a implementa programanan integral pa identifica y probecha oportunidadnan den region. Panama como hub logistico tin e capacidad di ofrece na nan bisiñanan den Caribe y Centro America productonan bao standard exigente asina como e opcion pa acerca su clientenan potencial.

Den evento aki a presenta diferente companianan Panameño cu tabatin como obhetivo explora mercadonan nobo,e biaha aki 11 compania a presenta e dianan 23 y 24 di november unda nan a pone den grupo, un cu tabata e gruponan di alimento cu compania cu ta fabrica hariña, dos compania cu ta bende awa den boter, productonan di lama, un compania cu ta produci patia y pampuna, tambe tabatin companianan di material di construccion, habon y productonan di limpiesa, belanan, refrigeracion y verf industrial specificamente pa camindanan (roadmark).

Esaki ta e prome biaha cu nan a bin Aruba den mision aki y tambe pa prome cu nan ta haci un evento conhuntamente cu e companianan exportado aki “esaki ta un oportunidad grandi pasobra e cumpradonan sa caba ki companianan a bin, kico nan ta ofrece y ken nan ta bay papia, nos ta wak cu bon wowonan e mision aki”, Dormoi a bisa.

Igualmente, el a splica cu nan a haci e mesun mision na Corsou na luna di maart unda el a afirma cu tabata “super exito, nos a haci 200 reunion cu 50 cumprado y nos ta kere cu nos por haci mesun cos na Aruba, ya cu nan ta hopi cerca y varios distribuido ta den e dos isla aki, nos ta confia cu e mision aki na Aruba ta bay haya hopi exito”, el a señala.

Pero sinembargo, Dormoi a informa cu nan mester duna siguimento unda den combersacion cu minister di Asuntonan Economico Geoffrey Wever, el a menciona cu Aruba si tin mester di opcionnan nobo y nan ta mira Panama cu bon bista pa esey.

“Na Panama nos tin hopi experiencia den temanan di construccion, nos ta construyendo e linea 3 di e train, nos tin experiencia di ampliacion di nos Canal di Panama, nos ta haci brugnan y piernan, edificionan halto cu tambe nos por ofrece na e pais aki pa su desaroyo”, Dormoi a sigura.

Pero no solamente, tabatin 11 compania cu a bin sino otro cu tambe ta importa frutanan pa Europa, Merca, tambe nan ta importa palo, carni, diferente opcion cu segun Dormoi por ta hopi interesante pa exporta.

Di loke ta trata e prijsnan, Dormoi a señala cu esey ta un bentaha, e cumprado di akinan mester evalua si ta un bon idea pa trece na Aruba un producto di e cual e tin interes, segun su experiencia, Dormoi a bisa cu na Corsou algun cumpradonan ta prefera di cumpra e producto di Panama cu di Europa pa via di e cercania, e fletanan ta hopi mas economico door di e distancia cu ta mas corto y un otro bentaha cu nan tin ta cu nan por haci productonan personalisa “diseña manera e cliente ta pidie, tur esey mester negoci’e pero pa loke ta trata prijsnan, di Panama pa Aruba e fleta ta mas economico y ta existi hopi bon transito maritimo, tur esey ta cosnan cu mester evalua, mi ta kere cu e prijsnan ta bay hopi competitivo y cu Panama ta un bon opcion ”, el a sigura.