Epidemiologonan preocupa cu Covid19 ya a plama den comunidad; Comunidad mester realisa cu e ta parti di e problema y solucion

Hospital a yega na su capacidad y un poco mas e por kibra. Esey ta reaccion di epidemiologo Juancho Ridderstap despues di tuma nota di e decision di Dr. Horacio Oduber Hospital, cu a anuncia cu unicamente lo trata casonan di Covid19 y emergencia.

Ridderstap a bisa cu e decision ey ta djis ilustra cu e informenan cu diferente nurse ta avisa den forma anonimo, ta corecto. Bon Dia Aruba por ehempel sa di tres fuente interno den hospital cu no tin capacidad pa trata mas pacient y cu e decision ya caba ta pa esnan cu no ta mes grave cu otro, lo mester bay cas.

E desaroyo aki tabata subraya caba pa vocero di HOH, Charlaine Huntington dialuna ultimo, ora cu el a confirma cu tin personal cu ta malo na cas, incluso debi cu nan a keda infecta pa un manera of otro cu Covid, y no na trabou. Y cu hende malo riba un cantidad di trahado cu ya caba ta na su limite, tin un impacto grandi pa e servicio cu por duna. Hospital lo por amplia cuanto cama cu e por, pero si no tin e personal suficiente, no por brinda e cuido necesario.

“HOH mes a anuncia cu ta bay para tur locual ta test y otro servicionan medico cu no ta relaciona cu Covid. Ta ora pa Director di Hospital splica e realidad.”

Di su banda, su ex-colega Maribelle Tromp di Lab Consult Aruba a bisa cu realmente e situacion ta hopi preocupante. E tin hopi siman ta adverti cu mester tuma pasonan concreto. E mesun informacion cu DVG ta duna di conoce, cu no sa con 1 riba cada 3 persona a keda infecta cu Covid, ta nifica cu e virus ta circulando tur caminda. Tambe, mas cu mita di esnan infecta ta hay’e na cas. E implicacion di esey ta cu isolacion na cas no ta bay bon, y consecuentemente, resto di famia tambe ta keda infecta.

Ademas, tin transmision na trabou. Bon Dia Aruba a compronde cu por ehempel tabatin caso na un casino tabatin un cluster entre coleganan. Motibo di un transmision asina ta pasobra hendenan tin e virus, pero no e sintomanan y como tal ta pega coleganan. Riba dje, e maneho a cambia, unda esnan cu tabatin contacto cu personanan cu e virus, no automaticamente mester keda den cuarentena, sino mester bay traha cu tapaboca.

Den combersacion cu Bon Dia Aruba, epidemiologo Tromp a ilustra e realidad serio di e promedio di haltisimo di caso nobo pa dia y e falta di informacion cla di ki dia e personanan aki ta nan prome dia cu a bira malo.

Sin e datonan aki no por tin un bon imagen di e desaroyo di e virus den tempo real, cu ta haci dificil pa bin cu un proyeccion. Mester bisa cu ayera a registra no menos cu 141 caso positivo, cu un porcentahe di infeccion di mas di 48 porciento. Si mester mira e grafieknan, e cantidad di casonan positivo ta den un liña cu ta sigui subi.

Tambe mester remarca cu no ta test suficiente hende, es decir cu mester por subi e cantidad di hendenan cu ta test y tambe e variacion di e hendenan aki. Pues no keda test contacto di contacto, pero test mas amplio den comunidad. “Asina bo ta haya un bista mas representativo encuanto con e virus ta presenta su mes den comunidad.”

Tromp tambe a tuma nota di e grado di hospitalisacion, y hasta e hecho cu a cuminza registra morto. Como tal e ta kere cu mester enfoca esfuerso pa proteha esnan cu ta mas vulnerabel, cu ta nos grandinan, y personanan cu cancer, diabetes y otro. Particularmente mester percura cu esnan cu ta cuida nan tambe ta test regularmente pa evita cu nan por hiba e virus pa e centronan di cuido.

Mester haci uzo di tur capacidad disponibel pa test y si por, haci un reparticion di esnan cu por test pa enfoca riba gruponan vulnerabel.

Pero isolacion ta keda un reto pa famianan, particularmente si no tin mucho espacio den cas. Maribelle Tromp ta cita e conseho di RIVM pa pone personanan infecta den edificionan separa, pa asina tin mas control riba e personanan infecta y por stop e transmision cu ta hopi halto awor aki. “Na Corsou tin un Covid hotel.”

Pero ta keda importante pa enfatisa tur dia cu tin hende tin sintomanan, pa no bay traha y yama dokter di cas mesora pa test. “E ta cuestion di ripiti, ripiti y ripiti tur e pasonan necesario manera, cu mester bisti tapaboca, mantene distancia social y laba man.”

Kizas mas crucial sinembargo, ta pa laga comunidad en general sinti su mes como parti di e problema, pero tambe e solucion. E hecho cu hopi hende na e alturanan aki ta bisa cu nan no sa con nan a haya e virus, ta indicativo di un situacion hopi serio cu mester di colaboracion di cada individuo. Particularmente si cada dia tin menos espacio pa trata hende na hospital.

Tur e casonan cu awe ta registra como positivo ta casonan di contagio di dos siman pasa. No ta cifranan di contagio nobo. Si sigui e rumbo actual, aki dos siman lo mira e cantidad di contagio cu ta sucediendo aworaki. Y nos ta djis sigui conta caso y conta morto… niun intervencion pa stop e transmision of yuda hospital.