Epidemiologo Maribelle Tromp ta cuestiona maneho inconstante riba control Covid19: “No por maneha un pandemia for di oficina”

Aruba tin un ‘backlog’ di dos dia den e testnan pa Covid19 y esaki por crea hopi problema pa maneha e pandemia. Esey ta opinion di e unico Epidemiologo di Aruba, Maribelle Tromp.

Tromp kende pa 16 aña a dirigi e trabou na Salud Publico no tabata nada sorprendi pa e brote grandi di Covid19 na Aruba. Y locual ta lamentable ta cu por a limita e brote, si a sigui protocolnan conoci den periodonan cu tin contagio grandi.

“E Gusto Cluster tabata evitable.  Si a sigui cu e precaucionnan manera tabata e caso prome cu a habri e fronteranan di Aruba, kizas lo no tabatin asina un brote grandi.” Maribelle Tromp ta bisa cu hopi hende a lubida cu desde cu Covid 19 a drenta, tin un normal nobo. Por a nota con despues cu e shelter in place a lanta, ora cu a para e toque de queda, hendenan a cuminza actua manera prome cu e pandemia. Tromp a bisa na varios ocasion hasta prome cu a habri dia 10 di juli, cu ta un caso di Covid19 so mester tin pa bolbe bin contagio.”E virus ta plama hopi lihe. Den mi concepto cu por a preveni.”

E descubri e contagio relativamente lihe, y esey riba su mes ta bon, pasobra e otro alternativa tabata cu e contagio lo a bira mas grandi.

Contact tracing

Ayera bolbe na e practica cu ta un solo luga ta encarga cu e test. HAVA a splica cu motibo pakico a test asina hopi ta pa yega nan tur esnan cu a yega den contacto cu esnan cu tabata den e grupo aki. Pero tambe tin e famianan di studiantenan cu awe na Hulanda ta conoci di ta positivo cu Covid19. Segun e Epidemiologo, e practica segun buki, ta cu na momento cu detecta un cluster. “MI no tin mucho informacion ki investigacion a haci , pero normal ta purba yega na  e caso cero, esta e prome persona infecta,  wak tur unda cu el a ba, cu ken el a drenta den contacto. Mester investiga e prome liña, cu ta e grupo cu ken ela drenta contacto prome, e di dos liña ta esnan cu a drenta den contacto cu pacient cero y a sigui socialisa. Pues ta di keda puntra cada persona cu ken e tabatin contacto, y acerca e contactonan ey. “Cu e cantidad riba 600, e ta nifica cu e ‘contact tracing’ ta un trabou immenso.”

Pa Maribelle Tromp e tabata dificil pa kere con a pidi un cantidad grandi di persona cu potencialmente ta infecta cu Covid19 pa sali di nan cas, sinta den rij y warda pa test. E maneho pa atende cu casonan lo mester tabata pa busca berdad kendenan lo por tabata den e ‘Gusto Cluster,’ identifica nan, y bisa nan pa keda cas den cuarentena. Y si tin sintoma, e ora nan mester bay tuma e test. Pero e test riba su mes no ta importante mas. Pasobra si tin sintoma, e caso ta Covid19 e ora.  Y si den e cas tin mas hende ta biba, mester asumi cu nan tambe ta infecta. Pero pa haci e evaluacion debido, no por regla e proceso via telefon. Ta cuestion di bisti bo pañanan protector y bay e cas. Salud Publico ta pafo den comunidad, no den oficina.”

Si a sigui e proceso aki, lo a scapa trabou, test y ta uza tur e esfuerso ey pa haci e contact tracing, Esey ta e trabou den un epidemiologia.  “Y ta pasobra a bay contra e maneho aki ,a crea hopi bruhamento y desconfianza. Mester a traha un bon plan di acercamento. No a mantene na un solo mensahe cu a crea panico y p’esey a mira rijnan largo pa test.” Algo cu Tromp nunca a mira na Aruba.

No mas test

Ta yega un momento cu e cantidad di caso ta asina grandi, cu den concepto di Tromp, mester wak cu e casonan ta mucho mas cu locual ta haya na laboratorio. Den epidemiologia no ta traha cu e datonan di laboratorio so. Ta traha cu caso sospechoso y cu casonan cu ta epidemiologicamente confirma. “Ta concentrando atrobe  riba casonan confirma so di laboratorio y esey no ta dato suficiente.”

Por ehempel, tin studiantenan di Aruba na Hulanda cu ta positivo. Nan a biaha recien. Mester pensa cu un mama, tata, ruman tur a braza e studiante. Pues e casonan mesora ta multiplica. Mester tene cuenta cu tabatin dianan di incubacion cu no tabata sa y a pega otro. “Si e famia tin cuater hende ta biba cu otro, den epidemiologia, mester multiplica esnan den cas y e cifra di casonan infecta mester refleha e multiplicacion aki.”

Epidemiologamente mester inclui nan como casonan positivo di Covid19,  sin cu nan mester a test positivo na un laboratorio. “Testing den ‘outbreak’ asina, den concepto di epidemiologia ta hasta bira innecesario, pasobra ta Covid19 ta test cu ta sigui. A test den e ultimo lunanan y no tin otro malesa. Pues en realidad, si un persona mustra sintoma y ta den e grupo di e cluster, den mi concepto, den epidemiologia, no mester test e mas. No solemente e ta pone un presion riba capacidad di testing, pero epidemiologicamente, e mester ta consider’e un caso mas di Covid19. Den salud publico di Aruba tin un concepto robes unda ta traha cu test so. Esey no ta epidemiologia.”

Virus a keda memey di nos

E ta bien posibel cu e virus a keda memey den comunidad ora cu e casonan di laboratorio a bira na cero. Tromp combersa cu hopi hende den sector di salud publico riba con  e strategia mester tabata cu ora cu e cantidad di caso yega na cero, “Ta e ora ey mester a haci testnan masivo. Na e momento ey, mester a laga hende cu of sin sintoma test pa sa si e virus ta circula si of no. No a haci esey. A scoge pa e cifra cero, pero esey no ta un meta  di Salud Publico basa riba epidemiologia.”

Tromp no ta duda cu e strategia cu a scoge pa traha cu dokternan di cas tambe ta algo bon, pero “Kico a demostra? Cu no tabatin caso di influenza of otro cu ta similar cu Covid, cu tabata hopi bon. Pero pa haci miles di test awor aki no tin sentido y no ta efectivo.”