Epidemiólogo Dr. Izzy Gerstenbluth a informa cu 75% di e 24 muestranan cu a manda RIVM na Hulanda a resulta positivo pa e variante ingles di Coronavirus.
Esakinan ta resultadonan di e di dos set di muestranan di e periodo di 16 pa 21 di februari 2021. Gerstenbluth a indica cu esaki ta e motibo cu e casonan di Covid 19 a subi asina rapido.
Mirando cu a detecta e variante di Covid 19 na Aruba, Boneiro y awor Corsou a manda mas muestra pa RIVM pa wak si e variante di California, Afrika y New York tambe ta den paso e variantenan aki ta mas contagioso. Esaki ta e motibo cu gobierno di Corsou no por a warda pa escala e medidanan paso e tasa di positividad a bira dobel den un siman.
Gerstenbluth a sigui bisa cu “Un aña largo nos a logra tene e situacion bou di control pero mester sigui cumpli cu e medidanan, incluso durante eleccion. No ta e intencion pa cancela eleccion pero e no mester bira un super spread event”.
E la haci un apelacion na ciudadanonan pa nan vacuna paso ora vacuna mas 80% di e poblacion e ora ey gobierno por escala e medidanan. Pa aworaki e lei di emergencia a wordo extende cu 90 dia.
