(AP) – Google a perde un demanda anti-confiansa tocante bareranan den su app store pa Android, mientras un hurado di corte federal a dicidi cu e compania su sistema di pago tabata contra competencia y ta causa daño na consumidor di smartphone ademas di desaroyadornan di software.

E ta un golpi fuerte na un pilar grandi di Google su emporio di tecnologia. Sinembargo tambe e ta un victoria pa Epic Games, e creador di e wega popular Fortnite cu a causa e demanda, y analistanan ta bisa cu ta un victoria pa henter e comunidad di desaroyadornan.

Epic, basa na North Carolina, a otorga e demanda contra Google 3 aña atras, acusando cu e gigante di buskeda riba internet a abusa di su poder y pa proteha su Play Store for di competencia pa asina por proteha un mina di oro cu ta crea biyones di dollar anualmente. Di mesun manera cu Apple ta haci pa su app store, Google ta colecta un comision di entre 15 pa 30 porciento riba transaccionnan digital ehecuta dentro di e aplicacionnan.

E hurado a yega su decision cu solamente 3 ora di deliberacion despues di a tende 2 ora di argumento for di abogadonan den ambos banda di e caso. Nan a tuma parti pa Epic, ken su abogado a ilustra Google como un bully cu ta usa un strategia di “soborna y blokia” pa descurasha competencia contra su Play Store y aplicacionnan pa Android. Google, segun Epic su abogado Gary Bornstein, ta haci demasiado preocupante pa consumidornan por descarga aplicacion for di otro outlet di distribucion cu Play Store.

“Googe ta haci un desafio pone un competidor riba e telefon si e ta di Android,” Bornstein a comenta. “Si e competencia ta manera un careda, e ta mane si Google por core riba un caya normal di asfalt y e resto mester core riba santo.”

Google a busca manera di evita tin un huicio cu hurado sinembargo Hues di Districto Mericano James Donato a rechasa esaki. Awo, Donato lo determina ki pasonan Google lo mester tuma pa caba cu e comportamento ilegal riba Play Store. E hues a indica cu e lo tin audiencianan riba e topico aki den e di dos siman di Januari. Dependiendo di con e hues aplica e hurado su veredicto, Google por perde biyones di dollar den ganashi anual genera for di su comisionnan di Play Store. Sinembargo e compania su fuente principal di ganashi, cual ta e avisonan digital conecta mas tanto cu su otro servicionan manera Gmail, etc, no lo ser afecta directamente pa e huicio su resultado.