Dialuna ultimo minister di Enseñansa Endy Croes den su ultimo conferencia di prensa a sigura cu tabatin hopi rumor tocante EPI y for di dia 8 di mei, dialuna ultimo, Colegio EPI tin un director nobo.
Diabierna ultimo, director Ryan Maduro a entrega un carta oficial (Ministeriële Beschikking), unda ta termina contract como director di Colegio EPI. Den esaki, a splica cu a cana un proceso largo, unda a instala un comision cu ta consisti di representantenan di Departamento di Enseñansa (DEA), Departamento di Inspeccion, Dienst Publieke Scholen (DPS) y Ministerio di Enseñansa cual a haci un investigacion durante periodo di varios siman.
Ademas di SIMAR, a invita docente, alumno, manager di cuater unidad (unit) y directiva di Colegio EPI pa nan papia tocante algun punto di atencion. A base di e resultado di e reunion aki, e comision a traha un rapport y un carta dirigi pa Ministerio di Enseñansa. E Comision di Enseñansa a duna conseho y den cuadro di esaki, nan a tuma cierto decision.
Desde dialuna ultimo, Sra. Ankie Danker ta fungi como directora di Colegio EPI, den cual e comision ta bay keda duna sosten: “E studiantenan ta keda central, pues tur cambio interno, planificacion, cambio di structura mester ta valido desde aña escolar nobo.”
