Ayera mainta, medionan di comunicacion a wordo convoca na EPB San Nicolas pa asina duna di conoce e acuerdo cu un organisacion comercial boluntario y un sector educativo a haci na beneficio di e hobennan studiante di e area di San Nicolas.

Rensley Mathilda, director di EPB San Nicolas, durante e conferencia di prensa a splica cu nan semper ta kere den desaroyo y porvenir di San Nicolas y su habitantenan, ademas di e barionan cu ta forma parti di e comunidad.

El a duna di conoce cu ayera a tuma luga e firma di un Memorandun of Understanding (MoU) caminda cu EPB ta forma parti di un compromiso cu San Nicolas Business Asociation.

Cu e presencia di studiantenan di cada sector cu a representa e scol completo, Mathilda a bisa cu ya caba nan ta e futuro di San Nicolas como tambe e futuro di Aruba. “Bosonan ta e fundeshi pa sigui desaroya e bunita bario aki di San Nicolas.”

Di su parti, Andres Hernandez, presidente di San Nicolas Business Asociation (SNBA) a comenta cu un aña pasa nan a sinta hunto pa haci e prome palabracionnan pa esaki por a tuma luga. Manera ta conoci, esaki tabata un aña cu hopi obstaculo y “por fin nos a logra e MoU aki”, el a sigura.

Igualmente, el a menciona cu tin un San Nicolas cu ta dificil pa hende di San Nicolas mes, pero cu nan ta weitando pa e mira un transformacion atrobe. “Nos tin un San Nicolas cu lo bay ta hopi diferente.” Tambe el a sigura cu nan mester di hopi ayudo riba loke ta informacion y hopi otro cosnan cu segun Hernandez, pa hende ta necesario.

El a reitera cu hopi palabracion a bay door pa nan por haci proyectonan hunto, un di esaki ta e compromiso di SNBA ta pa yuda e muchanan, e situacion cu tin na e momentonan aki pa studiantenan por haci un pasantia of pa nan por haya un luga pa nan caba nan studio ta yen di problema “y nos ta den plan pa yuda pa cu esaki y di hopi otro manera”, Hernandez a declara.

Ademas, el a informa cu nan tin otro contactonan pafo di Aruba cu tin interes pa tin un grupo di hende hoben pa cuminsa, tambe nan por bira comerciantenan di inmediato na unda nan ta den edad na unda nan ta pensa kico nan ta bay haci den nan futuro.

“Si educacion no te’y eynan nos no ta bay yega na nada”, Hernandez a afirma.

Asina mes, a informa cu esaki ta e prome MoU cu nan ta firma y cu nan tin planea pa firma cu diferente otro entidadnan di Aruba cu ta bay haci un formacion completo pa loke ta trata pariba di brug.

Hernandez a trece dilanti cu proximamente San Nicolas lo tin un hotel basta grandi cu ta bay ta eynan, e oportunidad pa mayoria di muchanan haci di loke ta e parti di stage t’ey, el a sigura cu e compania constructor di hotel a cera un compromiso cu nan caba cu pa cuminsa por lo menos di 7 pa 10% cu ta bay ta personal pa training di scol aki.

Diahnne Lejuez-de Cuba director di Stichting EPB tambe a ofrece algun palabra pa e personanan presente y a bisa cu firmando e acuerdo aki cada partido ta compromete su mes den yuda y forma, e futuro generacion di e hobennan profesional y den acuerdo aki, el a sigura cu ta garantisa cu ganado so ta bay tin, empresarionan, negociantenan y tambe studiantenan cu tambe tin hopi gana di e acuerdo aki pa motibo cu esaki ta pa brinda oportunidadnan pa nan bay core stage y asina nan por training pa ora nan lo drenta den mercado laboral.

“Esey ta bay habri hopi porta pa boso y no solamente stage, nos ta mirando proyectonan cu lo wordo haci conhuntamente” Lejuez-de Cuba a expresa.

Di mesun manera, un studiante di ultimo aña di Economia di nomber Ameily Charles cu tin 21 aña a conta cu el a haya e oportunidad aki hopi bon pa motibo cu pa nan cu ta di San Nicolas nan ta sinti mas alegre ora nan sa cu pariba tin cambio.

Ayesha (Karina) Engelbrecht ,asistente di minister di Enseñansa Armando Lampe pa loke ta trata proyectonan di area di Enseñansa a bisa cu nan tin un perspectiva di procesonan y eficientisacion di algun di nan, den caso aki nan cera un convenio cu SNBA pa motibo cu nan tambe ta sinti e necesidad pa pueblo di San Nicolas pa tin un persona cu ta traha hunto di un manera mas cerca cu minister manera Engelbrecht a señala pa asina presenta ideanan y plannan innovativo pa e area aki di e isla pa cu despues lo por wordo ehecuta.