EPB Oranjestad ta bati alarma pa problema social y inseguridad afectando muchanan den scol

Educacion Profesional Basico (EPB) di Oranjestad ayera mainta a duna un conferencia di prensa debi na incidentenan cu ta tumando luga den e institucion relaciona cu seguridad di studiante y maestronan Aunke e situacion ta bin tumando luga for di basta aña atras, nan a sigura cu a traves di tempo e situacion ta birando pio.

Par di dia atras a bira conoci den comunidad un bringamento hopi fuerte entre studiantenan, na unda un di nan a dal otro cu un mokete y e hoben a cay flauw. Pa e motibo ey, Erwin Lopez, director di e institucion aki conhuntamente cu director di San Nicolas, managernan, entre otro, a dicidi di yama un conferencia di prensa pa splica kico ta bin pasando na EPB Oranjestad y loke a sali den prensa, unda nan a haya prudente pa trece dilanti e situacion y ademas di pidi e ayudo necesario na instancianan concerni.

Manera a mustra riba diferente medio di comunicacion, tin basta problema na scol specialmente pafo di cura di scol, unda EPB ta haya alumnonan di tur bario y di diferente scol. Na EPB den e prome dos aña ta educacion general y e siguiente dos aña nan ta haya educacion profesional. Meta di e scol ta pa cada alumno cu caba sa un profesion of ofishi y asina por sigui studia of por bay traha. Tambe nan ta enfoca hopi riba norma y balornan pa na momento cu e alumnonan sali for di cura di scol, nan ta un bon persona pa sociedad.

Na e momentonan aki nan ta conta cu 1.000 studiante di cual un grupo hopi chikito ta duna nan “basta dolor di cabes,” manera Lopez a señala.

Problemanan social ta permanece y ta birando mas grandi

Pero loke ta sucediendo ta hopi preocupante, tanto pa studiante, maestro y pa e comunidad mes. Lopez a sigura cu tin basta gang den barionan cu cada dia ta birando mas agresivo, unda nan ta bin haciendo mas uso di arma. Y den barionan tin hopi problema social cu ta drenta den nan cura di scol, dunando como consecuencia cu nan ta purbando di tur manera pa bringa esaki cu trahadonan social y psicologo pa duna ayudo na muchanan problematico, pero nan ta ripara cu e problema ta birando mas grandi.

Na momento cu ta haci buskeda nan ta bin hayando “hopi arma” cu segun Lopez, no ta ser usa directamente den cura di scol, pero si e ta duna un preocupacion grandi entre e mayor- y docentenan.

Nan ta conta cu 2 security guard pa 1.000 mucha loke no ta suficiente, mirando e cantidad di caso nan ta solicitando mas ayudo. Esaki a trece como consecuenciacu e docente- y alumnonan no ta sinti nan mes sigur mas na scol, na unda a yega momento cu nan a bisa cu nan kier papia cu e bestuur. Nan a papia cu direccion caba, unda a splica nan na unda nan por yega y kico tur nan ta haciendo pa preveni e problemanan aki.

Lopez a sigura cu bestuur di biaha a tuma accion y nan a logra haya gesprek cu ministernan di Enseñansa y Husticia, unda nan a logra haya 2 guard extra pa yuda riba tereno.

Suplica pa mayornan pa duna un man cu nan yiu

E problema, segun Lopez, ta sinta den e hecho cu nan ta suplica mayornan pa papia cu nan yiunan. “Nos mester ayudo di mayornan, pasobra e problema social no ta un problema directamente di scol. Nos ta bring’e tur dia, nos ta aporta di nos banda tur lo cual nos por, pero mayornan tin cu duna nos un man. Nos so no por y nos no sa kico mas pa haci.” Lopez a sigura.

Lopez tambe a remarca cu si comunidad ta haya un impresion malo di e scol aki cu no ta bon, cu tin hopi pelea y ta hopi peligroso, “esey no necesariamente ta e caso. Den cura di scol nos tin nos problema, pero pafo di cura di scol nos no tin control riba dje. E peleanan cu ta pasa pafo di scol, nos ta actua como hende, pero como scol no tur ora bo mag di para pelea. Bo ta par’e pasobra bo ta hende grandi y tur hende den sociedad tin deber di para esey. Si mañan bo yiu ta bringa, bo ta desea pa cualkier hende stop e pelea. Esey ta cosnan cu nos tur tin cu aporta na dje pasobra e ta yuda den situacion aki.”

Nan tin hopi problema di bullying (termento) cu ta ser bringa pafo di cura di scol y ademas problemanan di gang cu tambe ta ser bringa pafo di cura di scol. Pa esaki, Lopez a comenta cu Polis ta di acuerdo pa yuda nan intensificando e controlnan rond di scol y den cura di scol pa cana rond.

“Docentenan ta sinti nan mes insigur, pero mi mester bisa cu desde cu nos a haya ayudo, nan ta wardando kico ta bay pasa y nan ta menos preocupa. Pero nos mester ayudo y esey ta e realidad.” Lopez a bisa.

E tendencia ta cu poco poco e nivel di violencia ta escala y Lopez ta sigura cu tin basta mucha cu ta den gang; pero na scol mes por ta 30 ta esnan cu di berdad ta causa problema.

Nan a yega di papia cu mayornan caba, pero ta bay yama back pa presenta na reunionnan pa asina informa kico ta pasando y kico scol ta spera di nan. “Hopi mayor ta traha di 6or mainta te 5or di atardi, nos tin hopi mucha cu ta na cas nan so, cu mucha ta cria mucha; pero mayornan tin cu haci mas esfuerso pa reeduca of guia nan yiu miho ainda.”

Mayornan consciente ta bay scol no solamente pa problema, sino tambe pa wak con nan yiu ta bayendo cu scol.

Hopi arma blanco haya na scol

Pa e pregunta riba ki tipo di arma ta drenta den tereno di scol, Lopez a comenta cu ta hopi arma blanco como slagersmes, hasta cuchiunan chikito, schroevendraaier, cu ta arma pa hinca. A yega di papia tocante arma di candela, pero nan no a haya esaki nunca.

Pa loke ta trata camaranan di seguridad, Lopez a bisa cu tin un proyecto di camara pa scolnan cu mester ehecuta door di minister di Husticia.

Solucion

E solucion na e momentonan aki ta pa pone mas guardia di seguridad. Nan ta bay haci mas buskeda pa saca mas arma for di tereno di scol. Ademas si un mucha no por funciona riba tereno di scol debidamente, tin cu sak’e y pon’e den un trayectorio apart, debi cu no ta un solucion pa kita e mucha for di scol y mande’ riba caya unda e mucha su condicion ta bay bira pio.

“Nos mester rondia un manera pa e muchanan aki haya atencion hopi mas, no solamente pa nan sin ofishi pero pa nan wordo reeduca. E tarea social ta bira hopi grandi, pasobra e muchanan aki pa hopi biaha no tin e di cas y eynan nos tin cu enfoca riba dje.”

Pa tur e motibonan aki nan ta haci un yamado na instancianan concerni y na mayornan pa papia cu nan yiu, pa motibo cu e problemanan social ta birando mas dificil, y den esaki como scol y como bestuur nan ta bay mira ki medidanan nan por tuma.