Si tin algo pa cual nos no por critica nos gobierno(nan), ta cu nan lo no ta siguiendo y incorporando tur lema y consigna cu ta na moda riba tereno di (bon) gobernacion. Y si gobernacion lo tabata organiza segun e lema y consignanann ey, lo nos tin nada di reprocha. Sin embargo, e realidad no ta asina. Cada vez atrobe nos por ripara e disparidad cu tin entre e metanan strategico proponi, y e practica di tur dia cu ta conta otro storia. Un atraso grandi den implementacion di ley y regla pa concretiza e maneho cu tin riba papel, y cu ta menaza di keda te ey tambe. Y kico ta pasa ora bin critica? No ta resta mucho di e discurso positivo y progrestista, pero al contrario e tono gubernamental ta bira defensivo. No defensivo pa defende e metanan ‘glorioso’ cu a adopta, sino hustamente pa defende e ‘status quo’ cu lo mester ta obheto di cambio pa mihor. E ora ta sali na cla cu no ta e metanan ey ta lo primordial, sino e interesnan estableci di esnan cu ta forma un obstaculo pa un futuro mihor.

Tin cierto tereno unda esey ta hopi visto, manera den maneho di medio ambiente. Regularmente e medio aki ta publica riba varios aspecto di medio ambiente, unda no ta mira avance den yega na maneho concreto cu ta di berdad atende e problemanan existente. Un di e ehemplonan mas tragico y alavez comico ta e maneho di desperdicio, cu e monton di sushi na Parkietenbos como testigo, silencioso y agobiante alavez, cu cada tanto tempo ta conduci na accion di e habitantenan di e barionan afecta. Pero ta parce cu despues di tanto accion, e comunidad ta cuminza custumbra cu e accionnan y ta crea e impresion falso cu e problema ta birando menos. Esey no solamente no ta berdad, lo contrario ta e caso. Kico pensa por ehemplo di e efectonan a largo plazo pa hende di tur edad, cu pa añanan largo ta exponi na e gasnan dañino di e dump? Acaso nos tin un gobierno cu ta percura pa investigacion cientifico y obhetivo, cu por expone pa henter comunidad kico ta e situacion real? No, y pa nos comprende pakico no, ta bon pa bisa cu nunca nan a hacie. E no ta pas den e maneho defensivo di e poder y interesnan cu segun nan mester defende. Por ehemplo, nos por bay back na tempo cu e refineria pa decadanan largo tabata venena henter San Nicolas cu su gasnan toxico, y nos a yega di mira sikiera un rapport tocante e efectonan di e refineria riba salud di e habitantenan? No, jamas, y ademas algun aña pasa ainda a firma un contrato cu un compania pa habri e refineria, unda atrobe a djis ‘lubida’ riba e cuadro di legislacion ambiental cu tabatin mester. Es mas, nos por a tende mas recientemente un representante di e otro intento fracasa pa habri e refineria, esun di Quanten LLC, cu ‘su boca a slip’ y a menciona como un di e bentahanan di Aruba e ausencia di ley ambiental cu por dificulta operacion di un refineria.

Y e diferencia nos por mira na otro isla den Caribe, St Croix, unda e entidad EPA di Merca a pone orden riba e refineria cu tabata dañando e lugar cu gast toxico. Si mañan bolbe un pirata aventurero cu ta priminti di habri e monton di hero bieu ey, nos lo mira nos politiconan practicamente lastra abao na tera pa duna e piratanan ey un caluroso bonbini na nos pais. Y de paso duna nan tur cos, incluyendo e ausencia di ley ambiental, cu lo keda presenta, atrobe, como un di e bentahanan grandi di nos pais.

Di e mesun manera aki lo keda vacila sin tuma decision encuanto e destruccion cu ta tumando lugar den e areanan berde, di conservacion di naturaleza, cu no tin proteccion di Parke Nacional. Aki tin un ‘free for all’ repugnante ta tumando lugar, acompaña pa e mesun actitud defensivo di nos gobernantenan y nan funcionarionan. Esnan cu a pone nan speranza riba e partido nobo den gobernacion, cu a campaña cu un bon paquete di consigna progresista, por wel di dobla warda, pasobra nada bon lo no resulta mas di nan participacion gubernamental, cu ta nada mas cu un copia exacto di loke tur esnan cu a goberna promer cu nan tabata practica. Den e sentido ey nos no ta mira un cambio den gobernacion, pasobra no ta logra pasa di vocifera maneho color di rosa, pa accion concreto.

E pregunta clave ta naturalmente pakico no ta logra? Nos ta kere cu e contesta ta den e hecho, cu un partner minoritario, y ademas sin experiencia, no por cambia e practica gubernamental cu ta keda dicta pa e partido mayoritario. Y esey si acaso nan tabatin e deseo pa cambia algo, pasobra nos no ta mira motibo pa sospecha esey tampoco. Cu tur esey nada ta cambia den e practica gubernamental, unda algun asesor mag hunga ‘mooi weer’ cu ‘beleid’ mientras no ta cambia e aparato pa implementa y vigila un maneho diferente. Prueba di esaki ta e situacion tristo, den casi tur departamento, di nan tareanan di vigilancia y imposicion di ley. Pa colmo, esakinan no ta asunto den agenda di COHO, asina cu di e banda ey tampoco tin speranza.